Lungleia an party office Hnam Run inkhawmah nimin khan thu sawiin Pu Rka hian Tuikuk te chu an mahni duhthu ngei a Mizoram chhuahsan an ni a, Mizoram tan harsatna nasa tak an siam a, tuna an awmna Tripuraa awm hlen tura ruahmanna siam a ni ta chu a lawmawm hle a ni a ti a, he thil hi Congress sorkar lai nise Sorkar laipuiin Pu Hawla sorkar kha tihpui tlakah a ruat ang em tih leh Tripura sorkar pawhin an duh angem tih chu zawhna lian tak a ni a ti a, MZU southern Campus pawh a hun taka sorkar laipuiin din phalna a rawn pe a ni a ti.
Pu Rka hian, CAB bill pass a nih dawn khan Mizo mipui ten nasa takin an duh loh thu an auchhuahpui tih a sawi a, heti chung hian sorkar laipuiin pass ngei a tum tih a lan avangin Mizorama Union Home Minister rawn kal hneah Chief Minister bakah tlawmngai pawl hrang hrangin Mizoram telh ve loh an lo dil a, chumi bawhzui chuan Delhi ah NGO hrang hrang aiawh te, Political party tin aiawhte chu Union Home Minister hovin an sawiho leh tih a sawi a, hetihlai hian Mizo te beiseina a chau hle tih sawiin CM, MP leh tlawmngaipawl te nawrna avangin CAB ah Mizoram chu telh a ni ta lo tih a sawi.
Pu Rka chuan, Sorkar hmasa Congress chu Mizoramah la sorkar se CAB ah Mizoram a awl theihna turin a nawr chhuah a rinawm loh a ni a ti a, Pu Zoramthanga kaihhruai sorkar chu Pathianin hriak thihin mal a sawm tih a chiang a ni a ti.
