Inner Line Reserved Forest Demand Joint Action Committee-in kum 1875-a British sorkar leh Mizo Lal, Suakpuilala’n Sa-ui tana ramri an kham bak Mizoram leh Assam-in ramri a nei lo tih an sawi. Aizawl Press Club-a thuthar lakhawmtute an kawmnaah an pawl hruaitute chuan, kum 1875-a ramri lo siam tawh chu luahlantute emaw nuaibo emaw ala nih loh avangin vawiin thlengin a la nung reng niin an sawi a, hemi hnu kum 1930-a Assam Chief Secretary hmalaknaa Mizoram chhunga Inner Line Forest an siam leh a hnu 1933-a Assam Chief Secretary-in thupek thar chhuaha Inner line ramri an rawn kham danglam leh chu dan lova hmalakna a nih thu an sawi. Inner Line Reserved Forest Demand Joint Action Committee hruaitute chuan, British-in India a awp lai khan Mizoram chu excluded area-a dah a nih avangin British India ram chhunga an dante chuan Mizoram a huam ve loh avangin Assam Sorkar hian ramriah thil tih theih engmah a nei lova, kum 1930 leh 1933-a ramri chungchang thupek a chhuah pawh hi awmze nei lo mai a nih thu an sawi. Zawhna chhangin an pawl Chairman, Pu F. Ngurbialvela chuan, iiner line Forest Reserned huam chhungah hnamdang cheng an tam tawh thu leh hemi kawnga hmalaknaah lehkha pawimawh (Document) neih \hat a pawimawh tih an hriat avangin kum 10 chhung Document an lakhawm tawh thu a sawi a, hei hi nakin zelah an behchhan tur a nih thu leh tun thla ni 20 leh ni 21 hian Inner Line Reserve Forest chungchanga inrawn khawmna ‘Zofa Convention neih a nih tur thu sawiin, hetah hian Mizo mipui a tam thei ang ber tel turin an sawm a ni.
Inner Line Reserve Forest Demand Joint Action Committee hi kum 2013-a pawl hrang hrang 16 aiawh kalkhawmin an din a ni a, Squarer Miles 509-a zau Inner Line Reserve Forest chu Mizote ta a nih angin laklet leh ngei a nih theih nan he Committee hi din a ni a. An pawl hruaitute chu political party-a nihna nei lo vek niin, Sorkar emaw, party emaw hama\hatna leh beihna tura din a ni lo tih an pawl hruaitute chuan an sawi.
