Zin veivah leh mipui chetvelna chungchangah khuahkhirhna dinglai tlema thlahdul a ni a, passenger phur chi lirtheiten an phurh theih zat chanve chauh phurh phal thin chu inkaihhruaina tharah hian hlih a ni a, Dan an zawm turte zawm chungin an phurh theih zat ang pangngai phura an tlan phalsak an ni tawh a ni. Registration number kawpkim leh kawpkim lo intlan chhawk chu Aizawl Municipal Area ah chauh hman tawh tur a ni a, hetihrual hian hmun dang atanga Aizawla lirthei lut tur lirtheite chuan registration number kawpkim leh kawpkim lo hmanga intlanchhawk hi an zawm a tul dawn thung. Number kawpkim lote hi Thawhtanni, Nilaini leh Zirtawpni ah tlan tur a ni a, a kawpkimte chu Thawhlehni, Ningani leh Inrinni ah an tlan thung ang. Pathianni ah erawh chuan phalna nei bik motor tih loh chu tlan khap chhunzawm a ni.
Sorkar hnathawkte pisa kai zat pawh tih pun hret a ni a, thawktu zawng zawng kal vek tura tih Dept thenkhat tih loh, Dept dang zawngah chuan Group A leh B ten nitin pisa an kai chhunzawm ang a, Group C leh D te, a hmaa hmun thuma thena hmun khat zel kaltir thin chu tunah chuan a zatve zelin pisa an kai tawh dawn a, Sorkar hnathawk hrisel lohna benvawn nei leh naupaite chu Dept hotuten medical certificate phut lovin Commuted leave an pe thei dawn a ni.
Bungraw lakluh chungchangah nitin khawsakna atana mamawh ni lo bungraw dang reng reng lalut turten Home Dept atanga phalna an lak hmasak ngai thin chu khuahkhirhna tharah hian Home Dept-in a phal zinga mi bungruaahte chuan phalna dil hmasak kher a tul tawh lo a, Home Dept in a phal zing ami ni lo lalut turte erawh chuan a hmaa kal dan ang bawkin mPass hmangin Home Dept phalna an la hmasa tur a ni a, bungraw lalut tur reng rengin mCovid-19 mobile application-a mPass hmangin emaw, ziakin emaw ramriah an bungraw phurh tarlanna declaration an thehlut ang.
Zan dar 7:00 leh zing dar 4:00 inkarah pawn chhuah khap chhunzawm a ni a. Hmasawn nana hmalakna leh mimal eizawnna te chu phalna hranpa lak ngai lova thawh phal chhunzawm a ni a, Mizoram chhunga awmsa labour te chauh ruaia hna thawh tur a ni thung.
Hnathawktute chu social distancing zawm chunga hna thawk tura tih an ni a. Zirna in, training institute leh sakhaw biakna hmunte pawh khar chhunzawm zel a ni ang a. Inneih inkhawm leh mitthi vuina-ah mi 20 aia tam punkhawm khap chhunzawm a ni bawk.
Bazar, dawr leh hmundanga kal turte chu hmai tuamna siamsa emaw, thil dang emaw-a hmai tuam ngei tura tih an ni a, mi 3 aia tamin dawr pakhat an nghah phal a ni lo a, dawr nghaktu ten hmai tuamna an hmang reng tur a ni a, kut silfai uar tura hriattir an ni. Dawr neitute chu anmahni dawrtu turte dinna tur, feet ruk kar danah ruahman tura hriattir an ni a. Dawr chhungah pawh feet ruka inhlata awm tur a ni.
Damdawi dawr tiam lovin dawr dang zawng chu tlai dar 5 ah khar vek tur a ni.
Hnathawhna hmunah te hian tum khatah mi panga aia tam thawh loh dan kawng dap tur a ni a. Tul bik thilah mi panga aia tam thawh a tul anih chuan inhlat taka awmin hna an thawk tur a ni.
Loneitu leh huan neitute, ran vulhtute, sangha dil neitute leh a thawktute pawh an hnathawhna hmunah midang nena inhlat thei ang bera thawk tura hriattir an ni a, Puanthuina, lumehna leh pheikhawk chhe siamna ang chi-ah te mi 5 aia tam awm phal a ni lo bawk.
