Hmeichhe officer te hotu-a dah an nih a rem lo nia sorkar laipui sawifiahna chu supreme court hian inthliarna dik lo, thil \ha lo tak a ni a ti a, hmeichhiaten hotu dinhmun, Command position an chelh ve theihna tura thupek a siam hi thla thum chhunga ti hlawhtling tur in Court hian Sorkar chu a hriattir a ni.
Court thutlukna ang hian a awlsam zawnga sawi chuan hmeichhe officer te chu Colonel leh a chunglam thlengin an hnathawh \hat dan a zirin mipa te ang bawkin an kai chho ve thei tur a ni.
Colonel chin an kai hian mahnia thutlukna siam thei dinhmunah an din \an a, Colonel hian battalion an ho tlangpui a, hetah hian sipai 850 vel an enkawl tawh \hin a ni. Hmeichhe officer te hian dan ang chuan sipai hotu lian ber thlengin an hnathawh \hat dan a zirin an kai thei tur a ni a, hetihrual hian sipai indona hmachhawn chi, infantry, artillerty leh armoured corps ang chiah te erawh hmeichhe officer te hi dahluh an ni rih lo thung.
Supreme Court hian hmeichhe sipai officer kum 14 aia rei, short service commission-a hna lo thawk tawhte pawh permanent commission-a luh an duh chuan an thei tur a ni a ti bawk a, sorkarin hmeichhe officer kum 14 chin la service tling lo te chauh permanent commission-a an luh theihna tura kalphung a duan chu a dik lo a ni a ti bawk.
Court hian mipa leh hmeichhia thliarna ang chi chu tih tawp tur a ni a ti a, hmeichhiaten mipate an phak lo nia ngaihna awm \hin chu tih bo a hun tawh a ni a ti. Sorkar lam chuan sipai rual, mipa hlang te chu hmeichhe thuhnuaia awm turin an rilru lam a la inpeih tawk lo niin a sawi a, hei hi supreme court chuan na takin a sawisel a ni.
