Prime Minister, Narendra Modi-a’n nizan dar 8 khan inkharkhipna tur hi a puang a, Modi chuan Pathianni kaltaa Janta Curfew neih takah ram mipuite’n an tih tur an hlen \ha hle a, eng harsatna pawh su tlang thei tur khawpin mipuite inpumkhatna hi a \ha a ni a ti a, inpuahchahna tam tak kalpui ni mahse, Coronavirus hi a darh chak hle a, tun dinhmunah chuan mitin tan tawmim chu ram mipuite ralthuam neih \hat ber a ni rih a, midang nena in hnaiha awm loh, Social distancing chu coronavirus veite tan chauh a ni lo va, mi zawng zawng, chhungkaw tin himna tur a ni a ti. Prime Minister chuan thuawih duh lo mi tlemte vangin khawtlang, state leh ram pum a buai hle thei tih sawiin, hetiang dinhmun hi a thleng a nih chuan ramin a tawrh dan tur chu sawi thiam rual a ni lo a ni a ti.
Modi chuan ni hnih chhung lock-down neih a ni tawh a, state sorkar-te pawh khauh tura hriattir an ni a, a tawng tawhte a\angin a pawimawh zia a hriat a ni a ti a, chuvang chuan ram pumah inkharkhipna complete lockdown neih chu a pawimawh hle a ni a ti.
Prime Minister chuan ram chhan turin mahni in chhuahsan loh tur a ni a, chhuah khap tlat a ni dawn tih sawiin, state leh UT zawng zawng, district leh khua leh veng tinah lockdown hi neih tur a ni a, Janta curfew aia khauh zawkin curfew neih a ni dawn a, ram pumah lockdown tluantling neih a ni ang a, in chhuahsan tawh lo turin mitin te a ngen a ni.
Modi chuan Lockdown-in a nghawng sum leh pai harsatna zawng zawng ramin a phur dawn tih sawiin, khua leh tuite nunna a pawimawh ber a, chuvangin mahni awmna hmun ngaia awm tlat turin mitinte a chah a, nitin mamawh leh \ul zualpui chu sorkarin a ngaihtuah zel dawn a ni a ti a, lockdown chu ni 21 chhung neih a ni ang tih a sawi bawk.
Modi chuan he hun hi a pawimawh hle dawn a, hemi hun chhung hian coronavirus natna hri tam tak a rêm hman ngei dawn a, World Health Organization chuan mi 1 chhung lek pawhin midang 100 a kaichhawn theih thu an lo sawi tawh a, a darh tawh chuan a lêt zela a pun avangte leh a hri kaite hi natna nei hmel pawh an put mai \hin loh avangin, ram dangte pawhin harsatna nasa tak an tawk mek reng a ni a ti a, Coronavirus darh zel tur ven kawngah tawmim leh inkharkhip tura sorkar ngenna ngai pawimawh ramte chuan ziaawm lam an pan \an tawh tih sawiin, heng ramte hi entawn tur an ni a ti bawk.
Prime Minister chuan Lockdown chhunga ina an awm hunah mipuite chu an nun thapa hnathawkte hre renga \awng\aisak turin mitin te a ngen a, chung mite chu doctor, nurse, para-medics leh pathologist-te chhun leh zana hna thawk te, in veng leh khawtlang tihfai leh himna atana hnathawkte leh chanchinthar dik leh rintlak lakhawm tura che journalist leh media mi zawng zawngte tan pawh \awng\ai turin mipuite a sawm a ni.
