Jammu Division-a ramri hnaih Rajouri leh Ponch disrict-ah te Pakistan sipaite chuan mipuite chu inhum nan-a hmangin civil mi te chenna hmun 12 a\anga 15 vel silai, laipui leh missile te’n an kap a, India sipaite chuan chhangletin na takin an beilet a, Pakistan sipai zingah thi leh hliam an awm nual a, LoC hrula Sunderbani Palling ala sector-a an post 5 an tichhe bawk. An inkahnaah hian India sipai 5 an hliam a, 2 chu Military Hospital-a hruai an ni. Baramulla district-a Uri Sectorah pawh inkahhai thuthlung bawhchhiat a ni a, pakistan sipaiten India lam an kah chu India sipai te chuan an chhanglet a ni.
Hetihlai hian Indian Air Force thlawhnate chuan Srinagar leh Budgam te an vilinin an enthla reng a, India police officer hlun Munir Ahmed Khan chuan Air Force te hnathawhnaah hian fighter jet pakhat a chesual a, pilot pahnih an thi tih a sawi a, mita hmutute chuan thlawhna tlakna tur mipuite an insaseng theih nan sipai te hian boruakah silai an kap tih an sawi.
Pakistan Armed Forces te chuan Pakistan ram chin pela thlawk IAF thlawhna pahnih a kap thla tih an sawi a, Major General Asif Ghafoor chuan thlawhna pakhat hi Pakistan huam chin Kashmirah tlain a dang zawk hi India huam chin Kashmira ah a tla niin a sawi a, India pilot pakhat man a ni tih a sawi bawk a ni.
India ram chin pel Pakistan Air Force thlawhna F-16 chu kahthlak a ni bawk a, Pakistan chhung, Nowshera sector-a Lam valleyah a tla a ni.
Pakistan sorkar chuan inrem tuma an beih laiin India chuan tharum thawhin a bei niin an sawi a, an ram venghima beihlet chu an tih ve ngei tur a ni tih an sawi, India chu indo pumpelh turin puitling leh fimkhur taka a chet a ngai a ni an ti.
Nimina IAF ten LoC hrul-a Jaish-e-Mohammed mifirfiakte inkhulhna hmunte bomb hmanga an tihchhiat hnuah Pakistan nen an boruak hi a \ang leh zual a, tukin khan venhim hnathawk sipaite mifirfiakte awmna hriattir an nih hnuah Jammu leh Kashmir-a Shopian kha-a Meemendar chu an dap a, mifirfiakte nen silaia an inkah hnuah Jais-e-Mohammed mi firfiak pahnih thah an ni.
