US-a Florida state hmar thlanga vaukam lam pan mek, thlipui na tak, Hurricane Irma chu a a hma ang em emin a thawk na tawh lo nia sawi a ni a, thlipui hlauhawm zawng tehnaa Category 5 a\angin Category 1-ah a tla hniam tawh a, Florida sanaa tukin dar 2:00 vel khan thlipui hi darkar khatah km 136.8 vela chakin a thawk a ni. Nimin khan Hurricane Irma hian Florida chhim lama thliarkar inkhaidiat, Florida Keys a nuai a, mi 5 vel an thi tawh a, kawlphetha pek chhuahna khawl a chhiat avangin mi 20,00,000 vel, eng nei lovin an awm mek a ni. Thlipui hi a hma aiin ziaawm deuh tawh mah se, Florida sorkar hotute chuan state mipuite chu a hma ang thova fimkhur tur leh chhiat rupna thleng thei laka inveng uluk turin an la hriattir reng a, state Governor, Rick Scott-a chuan social media hmangin mipuite chu pawn chhuak lo turin a chah a ni. Puan tawh angin, Hurricane Irma hi France ram tiat vela lian niin mi thiamte chuan an sawi a, darkar khata km 290 vela chaka thawkin, kar hmasa khan Caribbean biala thliarkar thenkhat a nuai a, thil tam tak a chhiat bakah mi 28 vel an thi a, Antigua and Barbuda PM, Gaston Browne-a chuan he thlipui hian Barbuda thliarkar chu luah tlak loh deuhthawin a siam niin a sawi hial a ni.
Chanchin Thar Hurricane Irma thawk na lo tan
