Hurricane Harvey thawkah mi 22 an thi tih nemnghet

United States-a Texas-a Houston khawpuia thlipui na tak, Hurricane Harvey thawkah mi 22 an thi tih nemngheh a ni tawh a, Houston Mayor, Sylvester Turner-a chuan khaw thim hnua pawn chhuah khapna thupek a siam. America khawmualpuia thlipui leh ruahpui thawk tawh zawng zawnga la na bera ngaih, Hurricane Harvey chuan Houston khawpui hi nimin khan a chhuahsan nia hriat a ni a, amaherawhchu ni 4 chhunga chawl lova ruahpui vanawn, cm 127 chuang a sur hnuah leh, darkar khata km 200 chuanga chaka thlipui a tleh avangin he khawpui hian a tuar na hle a, mi nuai 45 vel awmna, Harris County bial hmun zaa 25 atanga 30 inkar vel, tui lianin a chim a ni. Sorkar thuneitute chuan mi 22 an thi tih a chiang tawh tih an sawi a, chin hriat lohva awm zat erawh chu hriat chian a har hle niin an sawi. Chhanchhuah hna thawh mek a nih vang leh, hmun thenkhat chu tui lian avanga kal pawh a harsat avangin chenna in leh in dang chhe zat pawh hi chhut theih a la ni lo niin an sawi bawk. Nimin khan US President, Donald Trump-a’n Texas hi a thleng a, Hurricane Harvey tuar hmasa pawl, Corpus Christi leh Austin khawpuite a tlawh nghal a, President Trump-a hian he thil thleng hi rapthlak a tih thu sawiin, Texas chu chhel a tih thu a sawi a, US Labour Department chuan nimin khan khawchhung then faina senso atan Texas hnena dollar nuai 10 pek rawtna chu a pawm a, Thawhtanni khan President Trump-a hian Hurricane Harvey-in a pan mek, Louisiana-ah emergency a puang a ni.