Hripui avanga inkharkhipna kal mekah Mahatma Gandhi NREGA hnathawh dan tur ngaihtuaha mipui inkoh khawm a remchan loh avangin Khawbung Village Employment Council (VEC) chuan tukin khan Khawbung Community Hall-ah mipui aiawh tur thlan chhuah mi thenkhat an ko khawm.

Khawbung VEC te hian NGO leh party tin aiawh mi 2 theuh leh khawtlang parawn mi 5 ko khawmin Mahatma Gandhi NREGA hnathawh dan tur leh khawtlang inrelbawlna chungchang an sawiho a, thutkhawmah hian khawtlang inrelbawlnaa mipuite’n khawtlang din, school leh sanitation atana thawhlawm an thawh thin chu a chanve-ah an tihniam a. Hnathawh dan tur chi hrang hrang an ruahman nghal a ni. Hripui leng vangin mipuiin thawhlawm an thawh thin hi tih hniam a ni tih Khawbung VEC Chairman Pu F Vanlalriana chuan a sawi.