Thutkhawmnaah hian Home Department, Assam Rifles leh BSF ten ramri an ven dan thlirho a ni a, Chief Minister Pu Zoramthanga chuan Covid 19 hri leng mek chuan eng chen nge a awh dawn tih hriat a nih loh avangin Mizoram a him theih nan tha taka ramri venhim chhunzawm zel a tul tih a sawi a, BSF leh Assam Rifles te pawh uluk leh ngawrh zawka duty zel turin a chah.
Ramri venhim hna thawh kawngah uluk leh awmze nei zawka hmalak dan tur te, fur lo thleng tur ngaihtuah chunga indaihzai thei ang zawnga duty dan tur te, BSF, Assam Rifles, Mizoram Police te leh Village Level Task Force duty ten thawh hona \ha zawk an neih theih dan tur te an sawiho a ni.
Myanmar nen inrina hmun 50 velah Assam Rifles Company 22 ten venhim hna an thawk mek a, Bangladesh nena inrina hmun 40 chuangah BSF lam in venhim hna an thawk thung a, Mizoram Police te leh VLTF te ramri hmun hrang hrangah an duty bawk a ni. Mizoram Police hi COVID-19 vanga ramri venhim hna thawk tur te, Law & Order keng kawh tur te, Quarantine Centre venhim leh Contact Tracing hna thawk te-in an duty a, tun dinhmunah Police 2,906 an duty a ni.
Thutkhawmnaah hian Home Minister Pu Lalchamliana, Chief Secretary Pu Lalnunmawia Chuaungo, DGP Pu SBK Singh, Home Secretary Pi Lalbiaksangi leh Assam Rifles leh BSF hotute an tel a ni.
