NHM hnuai thawktute intelkhawmna pawl, Contractual Association sawi danin tunah hian thawktu tam zawkin May leh June thla hlawh an la dawng lo a, April thla atanga hlawh la hmu lo pawh an awm a. Naktuk atanga lungawi lohna lantira badge dum bel an tum hi tun thla ni 10 thleng chhunzawmin, chumi hnuah pawh hlawh pek an la nih loh chuan na zawka thuneitute nawr an tum tih an sawi.
NHM hnuaiah hian hna hrang hrang thawk; Doctor, Nurse, Health Worker, Laboratory Technician, Pharmacist, X-Ray Technician, Driver leh office staff, an vaiin mi 1665 an awm a, thu chhuah an siama an tarlan danin, hri leng mek dona kawnga a hma tawnga damdawi lam thawktute zingah a tam ber chu National Health Mission (NHM) hnuaia thawkte an ni.
Central sorkar inkaihhruaina danah an hlawh tur sum chu state sorkara a luh atanga ni 15 chhungin NHM account ah pekchhuah thin tur a ni tih NHM hnuaia thawkte hian an sawi a, hetihlai hian kum 2019-20 chhunga NHM tana pawisa lokal leh State sorkarin a tum ve tur zaa 10, a vaiin cheng nuai 3865 chu Mizoram sorkarin a la hreng a, hei vang hian hlawh la thei lovin an awm mek tih an sawi.
Sorkar kum kallai 2020-21 chhung pawhin an sum hmuh tur thawh khatna first istallment pek chhuah a la nih loh thu leh hei hian 2nd Installment hmuh tur pawh a tih hniam a rinawm tih NHM hnuai thawktute hian an sawi a, hlawh an lak theihna tura NHM sum Mizoram sorkara tang mek chu pek chhuah thuai leh Sorkar laipuiin a pawmpui anga hlawh leh hlawhpunna an la dawn lohte pek thuai an phut a, hna nghet, Regular post ruak a awmin NHM hnuaia thawktute chu sorkar laipui duhdan anga a ngheta an luh theih dan tur ruahmanna siam sak an phut tih an sawi bawk.
