HPC (D) pêng pakhat, Pu Lalhmingthanga Sanate kaihhruai leh Mizoram sorkar-in inbiak an tumna chu a hlawhchham nia hriat a ni. Home Department hotute hnen atanga Zonet thu dawn danin, Mizoram sorkar leh Hmar People Convention (Democratic), inremna zawnga an inbiak mekna-ah inremna tluantling a awm theih nan Mizoram sorkar chuan Pu Lalhmingthanga Sanate kaihhruaite hi telh ve a rawt a, heng mite hi Pu H. Zosangbera kaihhruai HPC(D) anen inbiak mekna-ah tel ve tura beisei an nih laiin inbiakna dang buatsaih leh, thil phut hrang hrang an neih avangin Mizoram sorkar chuan biak loh mai ni se a ti ta zawk nia hriat a ni. Mizoram sorkar leh Pu H. Zosangbera kaihhruai HPC(D) hel pawl inbiak mekna chhunzawm hun tur chu hriat a la ni lova, inbiakna hnuhnung ber, kumin April thlaa neihah khan June thla vela chhunzawm tura tih ni mah se, thil tihfel ngai a awm avang leh tun hnaiah Pu Lalhmingthanga Sanate kaihhruai HPC(D) pêng pakhat nen inbiak theih dan tur buaipui a nih avangin inbiakna chhunzawm hun tur hi ruat a la ni lova, thil a kal tluan chuan chhunzawm thuai tum nia thu dawn a ni.
