HPC-D helpawl leh Mizoram Sorkar-in inremna zawnga inbiakna an kalpui mekah vawiin atang khan Political Level-a inbiakna neih tan a ni a, inbiakna hi naktuk chawhnu dar 1-ah chhunzawm leh a ni ang. Inbiakna hi chawhm dar 11 khan Chaltlanga State Guest House-ah tanin, tluang taka neih a ni a, Inbiaknaa Sorkar lam aiawh zinga mi Law Commission Chairman, Pu John Siamkunga MLA chuan, inbiakna chu boruak tha tak hnuaiah tluang taka neih a ni tih Zonet a hrilh a, inbiakna hi naktuk chawhnu dar 1-ah a hmun ngaiah chhunzawm leh tur a nih avangin thutlukna an siam dan tur sawi lawk theih a ni rih lo tih a sawi. He inbiaknaa HPC-D lam aiawh, an thupuangtu nibawk, Pu Lalthalien chuan Official Level inbiakna-a an thu lo dah tawhte an thlir let ber tih sawiin, harsatna lian tham an nei lo tih a sawi a. Nikum kumtawp lam khan Hmar mipuite tan hmun hrang hrangah inrawnkhawmna buatsaih a ni a, heta an thurel 4 chu vawiin inbiaknaah hian an chhawp chhuak tih a sawi a, tun tuma inbiaknaah hian Accord emaw Settlement emaw siam theih ni dawn rih lo mah se, chumi atan thil pawimawh hrang hrang te tihpuitlin theih an inbeisei tih Zonet a hrilh.
Puan tawh thin angin, remna kawng zawnga Mizoram sorkar leh HPC(D) hel pawl inbiakna hi kum 2016, August ni 10 atang khan Official Level-ah tan a lo ni tawh a, nikum September ni 22-a inbiakna neih a nih tum khan inbiak lehna chu thuneihna sang zawk nei Political Level-a neih ni se tiin thu an dah a ni. Vawiin inbiaknaah hian sorkar lam chu Chief Minister Political Adviser, Pu Lalrinmawia Ralte MLA leh Law Commission Chairman, Pu John Siamkunga MLA-in an hova, anni bakah hian Planning Secretary, Dr. C. Vanlalramsanga, Additional Home Secretary, Pu Lalbiakzama, GAD Jt. Secretary, Pu Vanlalmawia, CID Special Branch SP, Pu Rodinhgliana Chawngthu, RD Director, Pu Lalhriatpuia, Home Dy. Secretary, Pu R. Lalthazuala, OSD Home, Pu David H. Lalthangliana leh Home Dept Under Secretary, Pu Zahmingthanga te an tel a ni. HPC(D) aiawhte hi an Working Chairman, Pu LT Hmar hovin, Pu Lalthalien, Dr. John Pulamte, Pu Lalthlamuana Hmar, Pu David Buhril, Pu Lalrammuanpuia, Pu Lalmalsawma Darngawn, Pu Rohringa, Pu Lalvenhima Hmar leh Pu HC. Lalmalsawma te an ni a. Inbiakna hi tum 5 neih a lo ni tawh a, hengah te hian HPC(D) te thil phut leh sorkar pek theih chinte sawihovin remna siama inbiakna hmawr bawk dan tur thlengin sawiho a lo ni tawh a, chung zingah chuan Sinlung Hills Council siam rawtna te, HPC(D) hel pawlte nunphung pangngaia an lo let lehna tura Memorandum of Settlement siam dan tur te, HPC Area tia hriatah remna leh muanna boruak tha a awm zui zel theihna tura ruahmanna siam te a tel a ni.
