Serchhip thlai thar hralh chungchang sawifiahna an siama an tarlan danin COVID-19 hri len hma zawng khan Zikhlum chu wholesale-ah kg. khat chu Rs. 17 a pek \hin a ni a, mipui hnena hralh chhuah lehna chu kg. khatah Rs. 50 bawr vel a ni. COVID 19 Vegetable Supply Chain hian kuthnathawktute hmakhaw ngaiin Kg. ah Rs. 25-a lak sak nise, za 15 a sangin Local Level Task Force-ah pek chhuah leh ni se tih a rel a, Committee-in a rel ang hian March ni 28-a Zikhlum lo thleng chu Kg.-ah Rs. 25 a lak a ni a, Task Force hnenah zaa 15-a sangin pek chhawn a ni a, heta \anga Rs. 3 vel chu a buaipuina senso phurhruk nana tih a ni.
March ni 31-a lo thleng erawh chu Kg.-ah Rs. 30 a lain, Task Force hnenah Rs. 40 a pekchhuah leh a ni. Thlai dangah erawh chuan tel khat emaw Kg. khat emaw zelhah a buaipuina senso atan leh hralh tlak loh chhia awmte phuhruk nan Rs. 10 zela tova hralh a ni a. Hetiang a ni chung hian thlai man petu MIZOFED hian cheng nuai 3 bawr vel a hloh mek a ni, an ti.
Zikhlum hralhna Kg. khat Rs. 25 zelah kuthnatawktu ten Rs. 20 chauh an chang nia sawi chungchang chu Serchhip Farmers Society lam thuneihna a nih avangin Horticulture Department chuan sawi tur an nei lo tih an sawi a, Serchhip District Consumer Association Secretary-in nimina thuchhuah a siam chu Association President leh midang hriatpui loh a ni, an ti.
Horticulture Department chuan, kuthnathawktuten thlai an hralh theih nan leh mipuiin thlai eitur an neih theih nan theihtawp an chhuah zel dawn tih a sawi a, Vegetable Supply Chain chungchang chu thil thar a nih avang leh inpuahchah lawkna a awm lo a nih avangin a thawktute pawhin duhthu sam lohna tam tak an nei ang tih hriat a ni an ti a, mipui hriatthiamna an ngen tih an sawi.
