Hong Kong hian rel leh tuipui hmanga China kalpawhna zawng zawng a khar a, amaherawhchu, health worker te chuan China kalpawhna zawng zawng khar an duh tih an sawi a, Thawhlehnia an nawrh chhan tihhlawhtlin a nih loh chuan doctor leh nurse te pawh an nuar chhunzawm ve dawn a ni.
Hong Kong-ah hian coronavirus kai mi 15 finfiah an ni tawh a, hetihlai hian China chuan Hong Kong-a zin tumte visa tihchhuah chu a tihtawp lailawk tir a ni.
China bikah hian coronavirus vei mi 17,000 aia tam an awm tawh a, mi 361 an thi tawh bawk. China pawn lam, ramdangah mi 150 aia tamin an vei tawh tih finfiah a ni a, Phillipines-ah mi pakhatin a thihpui tawh bawk a ni.
Ram hrang hrang te chuan Coronavirus a len hnua China zin te reng reng an rama luh an khap a, chung ram zingah chuan US, Australia, Singapore, New Zealand, Israel, Japan, South Korea te chu an a langzar zual a ni a, ram \henkhat, Egypt, Finland, Indonesia, UK leh Italy te chuan China-a a\anga an rama thlawhna lut tur reng reng an dang bawk a ni.
China tih loh ram danga coronavirus kai tamna ber chu Japan niin mi 20-in an vei tawh a, Italy, UK, India, Philippines, Russia-ah te chuan mi 2 \heuhin an vei tawh tih finfiah a ni bawk.
China chuan coronavirus vanga harsatna a tawh sutkian nan coronavirus kaite enkawlna tur bik damdawi in pahnih a din a, heng damdawi in te hi ni 8 chhung sak a ni a, pakhat zawk, Wuhan-a Huoshenshan chu peihfel tawh niin, khum 1,000 a leng a ni. Hetihlai hian Leishenshan-a sak mek chu tunkar Nilainia hman theih turin peihfel a ni ang.
China National Health Commission tarlan danin China-a hri leng kai nia inringhlel mi 21,558 an awm a, mi 1,52,700 enthlak mek an ni bawk a, chung zingah chuan mi 475 te chu chhuah an ni leh tawh a ni.
