Home Minister hian vawiin khan Joint NGO Co-ordination Committee hruaitute chu kawmin Republic Day Boycott an tum chungchang hi a sawipui a, hetiang ruahmanna an siam chhan Citizenship (Amendment) Bill, 2016 chu an party mai ni lo, Political Party hrang hrang pawhin an duh lo tih sawiin, an dodal thu pawh Chief Minister, Pu Zoramthanga ngeiin tun hnaia Delhi a zin \umin Prime Minister leh Union Home Minister a lo sawipui tawh tih a sawi a. Hetihrual hian, he Bill duh loh lantir nana Republic Day Boycott an tum chu thil \ha ber nia a hriat loh thu sawiin, a mimal ngaihdan tak phei chuan Republic Day hi an Boycott duh a nih pawhin sorkar function tibuai lo zawngin he Bill an duh lohna hi ralmuang takin lantir thei se a duh tih NGO hruaitute chu a hrilh a ni.
Principal Secretary (Home), Pu Lalnunmawia Chuaungo pawhin, Citizenship (Amendment) Bill, 2016 duh lohna chu pawl hrang hrangin an lantir mek tih sawiin, Mizoram Legislative Assembly nikum June ni 28-a \hukhawm pawhin he Bill an duh lohna hi lungrual takin a lo pass tawh a, hemi hnu August ni 1-ah Sorkar laipuiah he Bill an dodal thu hi thlen a ni tawh bawk a. MNF kaihhruai sorkar thar-a Cabinet Meeting hmasa berah pawh he Bill an duh loh thu hi pass-in Rajya Sabha-a Pass a nih loh nan hmalak an lo rel hial tawh a ni, a ti a. Republic Day chu Sorkar mai ni lovin India mi zawng zawng ta a nih angin a indang zawnga thil tih chu thil \ha ber nia a hriat loh thu a sawi ve bawk a. Jt. NGO Co-ordiantion Committee Chairman, Pu Vanlalruat chuan, Republic Day Boycott an tum chhan chu buaina leh harsatna thlen an tum vang ni lovin he Bill an dodalna kawngah Sorkar laipui hotute kaihharh an tum vang mai a ni tih a sawi a. Citizenship (Amendment) Bill, 2016 an duh loh thu hi he Bill zir chiang tura din, Joint Parliamentary Committee hnenah kum 2017 khan an lo thlen tawh thu leh hemi hnua Prime Minister leh Union Home Minister-in Mizoram an lo tlawh \umah pawh an dodal thu an thlen chunga a tihlawhtling tur ang zawng hmalak chhunzawm zel anih avangin, Republic Day boycott chu an rel ta tih a sawi.
Home Minister ngenna hi NGO Coordination Committee hian vawiin tlai vek khan an ngaihtuah nghal a, Home Minister ngenna chu zahawm an tih thu sawiin, hetihrual hian ruahmanna an siam lawk tawh angin Republic Day lo thleng tur chu boycot nise tiin an thutlukna lo siam tawh an nemnghet nawn a ni.
Joint NGO Co-ordination Committee-ah hian pawl 5- Central YMA, MUP, MHIP, MZP leh MSU te an tel a ni.
