Vawiina banna a thehluh dawn hian Assembly Speaker, Pu Hiphei leh Deputy Speaker, Pu R. Lalrinawma te chu Pisa an kai loh avangin Assembly Secretary, Pu SR Zokhuma’n a banna lehkha hi a lo dawng a ni.
Pu R. Lalzirliana’n MLA a\anga banna a thehluhnaah hian MNF Treasurer, Pu Vanlalzawma MLA leh General Secretary, Pu Lalruatkima MLA bakah MNF Party hruaitu \henkhatin an \awimawm a, banna a thehluh hnua thuthar lakhawmtute zawhna chhangin Pu R. Lalzirliana chuan, MLA a\anga a ban chhan chu kumin November ni 28-a Mizoramin Assembly inthlanpui a hmachhawn hunah chuh ve a tum vang leh hetah hian Candidate dangte nen nihna inang tlanga inthlan hmachhawn ho a duh vang niin a sawi a, karleh Thawh\anni hian MNF party a zawm dawn tih a sawi.
Zawhna chhangin Pu R. Lalzirliana chuan, MNF party ticket-a inthlan chuh ngei a tum thu a sawi a, nimina Congress Party-in an Party Ticket-a ding tur an puanchhuah chungchangah an in set hlum nia a ngaih thu a sawi bawk.
MPCC Vice President hlui, Pu R. Lalzirliana hi MPCC Disciplinary Action Committee chuan September ni 11 khan show cause notice pein, September ni 14 tlai dar 3 hmaa an party mipuite hriat theih tura insawifiah turin an hriattir a; Pu R. Lalzirliana hian September ni 14 khan Congress Bhavan inkhawmah thu a sawi a, an party Disciplinary Action Committee-in insawifiah tura a hriattirna chu chhan tlaka a ngaih loh thu sawiin, hemi ni vek hian Chief Minister hnenah Cabinet Minister a nihna a\anga banna a thehlut nghal a ni. Hemi hnu hian September ni 17 khan MPCC Disciplinary Action Committee Chairman, Pu C. Lalpianthanga chuan Pu R. Lalzirliana chu Congress member a nihna chawlh tir a nih thu a puang zui a ni.
Home Mimister hlui, Pu R. Lalzirliana’n banna a thehluh hma tun thla ni 3 khan Minister hlui, Pu Lalrinliana Sailo pawhin MLA a\anga banna Assembly Speaker, Pu Hiphei-a hnenah a lo thehlut tawh a, banna a thehluh hnu October ni 5 khan MNF Party a zawm nghal a ni.
