Aizawl District, Chalfilh bial chhung, Northeast Tlangnuam-ah Manipur lam hel pawl ZRO mi tirh nia insawiin khawtlang hruaitute nizan dar 6:30 vel khan kokhawmin MNF candidate vote turin a hrilh niin Chalfilha Congress candidate Pu LT Hrangchal chuan a sawi a, hemi chungchang hi Chalfilh bial Returning Officer hnenah ziaka thlenin, a lehkha copy chu Aizawl District SP leh MPCC President hnenah a thawn a ni.
Hetihlai hian Lengteng North Block Congress Committee President, Pu Lawttluanga leh ZPM Lengteng North Block Chairman, Pu Zairimawia te chuan ZRA nia hriat ten he biala MNF candidate vote turin mipuite an hrilh niin an sawi bawk a, hemi chungchanga vawiina thuchhuah an siamah heng mi te hi Aizawl mi pahnih leh Mimbung mi pahnih niin an sawi a, an thil tih dan an dem thu an tarlang bawk.
Lengteng North Block MNF pawhin vawiin khan Ngopa Police Station ah FIR thehlutin Lengteng North Block MNF in hel pawl ZRA ruaiin Congress mite vau anga thu vawrhdarh awm chu an lungawi loh thu leh a vawrhdarhtu chiahpui khuaa Vungrozami chu zawn chhuahsaka dan anga hma lak sak turin an ngen a ni.
Hetiang thu leng vel karah hian Lengteng Bial huamchhunga Chiahpui Village Council chuan an khuaa ZRA ten Congress party mi \henkhat vau anga thuthang awm chu thu dik lo a ni tih thuchhuah siamin an sawi ve thung a, Lengteng North Block Congress chu Chiahpui khawtlang timualphoa hel awmna hmun anga an chhuah chu an ngaihthiam loh thu sawiin thupha chawi tura an phut thu an sawi ve thung a ni.
Zonet zawhna chhangin Mizoram Police hotute chuan he mi chungchang hi chhuifiah mek niin an sawi a, Ngopa Police hotute chuan heng mite hi an motor nen hren an nih hnuah Saitual Police Station-ah thu zawhfiah turin vawiin khan an thawn a ni. Zonet zawhna chhangin Saitual Police hotute chuan heng mite hi man ni lovin thu zawhfiah atan hren an ni tih an sawi a, campaign phal tawh loh hnuah an campaign avanga thu zawhfiah tura hren niin an sawi. He thil thleng chungchang zawhna chhangin Mizoram Police hotute chuan he thil hi harsatna leh buaina tichhuak zui tur ni lo leh boruak chhe siam zui tur chi ni lovah an ngai tih an sawi.
Lengteng bialah ZRA helpawl nia hriatte Party pakhat tan an campaign nia sawi chungchangah a \ul anga hmalak sak turin ZPM General Headquarters-in Central YMA an ngen.
ZPM hruaitute \henkhat chu vawiin khan Tuikhuahtlanga Central YMA Pisa-ah lengin Lengteng biala ZRA helpawl ni ngeia hriatten Political Party pakhat vote turin mipui an hrilh nia sawiin, hemi chungchangah hian Lengteng Block ZPM leh Congress pawhin thuchhuah in\awm siamin, he thil an dem thu an tarlang hial niin an sawi a, he thil thleng chungchangah hian Central YMA chu thuchhuah siama thil tisualtute leh an Party hming tarlang tura an duh thu an thlen a ni. ZPM a tel zinga Political Party pakhat chu kum 2013 inthlan dawnah finfiahna mumal awm lovin helpawl thawhpui anga thu thehdarh a lo ni tawh niin an sawi a, tun \uma thil thleng hi a tak ngei, Police pawhin thil tisualtute an man ngei bawk avangin Central YMA chu darh zau thei ang ber leh YMA dinna hmun hrang hrangah vote thlak hma ngeia thuchhuah siam tura an phut thu an sawi.
Hei bakah hian ZPM hruaitute chuan, NGO coordiantion Committee-in Chakma candidate dah lo tura Party tinte a ngenna chu Party dang zawngin an bawhchhiat laiin ZPM chauh chu a zawm awmchhun a nih thu an sawi a. He mi chungchangah hian an ngenna ngaipawimawhte hming hmerha fakna leh thlawpna tun thlenga tarlan a la ni lo chu hun kal zelah NGO Coordiantion Committee thu leh hla ngaihpawimawh lohna thlen palh thei a nih avangin vote thlak hma ngeia lawmthu sawina rampum mipui hriata puangzar tura an duh thu an thlen bawk. Vawiina ZPM hruaitute Central YMA Pisa-a an len lai hian Central YMA Office Bearer-te an lo awm loh avangin CEC member pahnihin an lo dawngsawng a, ZPM hruaitute thuthlen chu an hotute hnenah a rang thei ang bera thlen a nih tur thu ZPM hruaitute chu an lo hrilh a ni.
Central YMA hruaitute nen an inkawm zawha thuthar kahawmtute zawhna chhangin ZPM Steering Committee Chairman, Pu Lalliansawta chuan, helpawl thawhpuia inrikrapna thleng nia sawi chu mipui himna tichhe thei thil a nih avangin a mawhphurtute pochhuak tura hmalak sak turin Central YMA chu an ngen tih a sawi.
