Vawiina Shillong lam atanga lo hawte zingah Aizawla anmahni lo buaipuina hmun, R Dengthuama Hall zing dar 4-a thleng tawh, tlai dar 5 pelh hnua an inkhung hranna hmun tura dah luh chauhte an awm a, Hall pawnah hian darkar 13 vel nghah tir an ni. Shillong atanga lo haw, a fate lo ngaihventu pa pakhat chuan a fate hi zingkarah R Dengthuama Hall ah hian an thleng tawh tih a sawi a, Hall chhungah an luh phal a ni lo a, nisa leh ruah laka tawm himna tur hulhliap a tlem a, inkalpawh theih a ni bawk si lo a, an khawngaihthlak hle a ni a ti a, chawhma dar 10:45 velah chaw ei tur pek an nih chauh avangin an ril a tam bawk a ni a ti.
A hmuna kal Zonet Corr sawi danin, vawiina Aizawla lo thlengte hi Shillong leh Guwahati-a tangkhangte an ni a, Shillong atanga lo haw an tam ber a, Bus 10 leh Maxi Cab pakhat hmangin an lo haw a, Guwahati atangin Mini Bus pakhat hmangin tangkhang tlem azawng an lo haw bawk a ni. A lo thleng hma pawl hi zing dar 4 vela thleng an ni a, Zonet Corr in a biak pakhat chu zing dar 4-a thleng tawhte zinga mi a ni a, ani pawh hi tlai dar 5 pelh hnu khan a inkhunghranna tur hmunah luh tir chauh a ni.
Hetihlai hian heng tangkhang, lo haw tharte lo buaipuitute chuan District danga kal zel turte an buaipui hmasa a, Aizawl-a khung hran turte chu a hnuhnunga buaipui turin an dah tih a sawi a, an inkhung hranna hmun panpuina tur lirthei thenkhat-ah harsatna a thleng bawk a ni an ti. Aizawl District-a sorkar buatsaih Quarantine facility hrang hrangah hmun ruak an neih dante an inzawt chawp bawk niin Zonet zawhna chhangin an sawi.
District danga kal zel turte zingah pawh chhuak hma thei chuang lo an awm tho tih Zonet Corr chuan a hmu a, a then chu tlai dar 5 rik dawn tawhah an chhuak thei chauh a ni.
Hetihlai hian Zonet in a biak, lo haw hlimte hian eitur chu an dawng tha tih an sawi a, tih theih dang a awm loh avangin tawm hulna remchang lai-ah thuneituten an hming an lam hun an nghak mai tih an sawi.
State Control Room on Covid-19 chhinchhiah danin nimin lamah khan State thenawm atang hian mi 380 an lo haw tawh a, vawiina an chhinchhiah chinah mi 220 an lo haw leh bawk. A tira Mizorama lo haw tura sorkara inhriattir chu mi 700 vel an ni a, in-report hi an pun chhoh zel avang leh, in-report lem loa mahni thua rawn haw te an awm bawk avangin atira rin lawk aiin an pun chhoh hle rin a ni.
Tangkhang, lo haw te hi District tin bawrhsap ten an lo buaipui a, vawiin thleng khan Shillong, Guwahati, Silchar leh Manipur lam atanga lo haw, Mizoram lo thleng an awm tawh a, Tripura lam erawh chu tlan phalna an la hmuh theih rih loh avangin Mizoram panin an la chhuak thei rih lo a ni.
Assam leh Meghalaya a\anga lo hawte hi Vairengte-ah an lo lut a, Manipur a\anga lo hawte chu Khawkawn-ah lo lutin, Tripura a\anga lo haw turte chu Kanhmun-ah an lo lut dawn a ni. Sorkar dan dinglai angin ni 14 khung hran vek an ni dawn a, an awmna District Bawrhsap \heuhin a khung hran dan tur hi an lo buaipui a ni.
