MNF Vice President Pu R Tlanghmingthanga chuan hlemhletna tel lo sorkar siam chu MNF thupui ber a nih thu a sawi. He thu hi vawiina Aizawl West II MNF Block Conference, Kanan Veng Multipurpose Hall-a neih a hmanpuinaah a sawi a. Pu R Tlanghmingthanga chuan, MNF chu Pathian leh ram tan titu a nih avangin Party dang sorkarin an tih ang mai maia ram hruai thei an nih ve loh thu sawiin, party tana sorkar an nih loh thu leh mipui leh ram hmasawnna tura sorkar an ni dawn niin a sawi . Bialtu MLA Pu Lalruatkima pawhin thusawiin Corruption avanga tluchhe mek Mizoram chu tungding leh turin MNF Sorkar a tul a nia sawiin, Congress sorkar, eng kawng maha mawhphurhna la ngam lo, insawifiah leh insawithiam ringawt ngaihtuah hi mipuiin thlak an duh tawh niin a sawi bawk. Inkhawm hi Aizawl West II MNF Block President Pu R. Thanglura AMC Councillor-in a kaihruai a, Martar-te sunna hun hman bakah Hnam Sipaite an chawimawi a thuziak leh tawlhlohpuan an hlan a ni.
