Vawiin Assembly Session ah MNF member, Dr. Vanlal\anpuia zawhna leh zawhbelhna dangte chhanga he thu hi sawiin, Dr. Lalthangliana chuan, Lungleia Mizoram University Campus din hi Mizoram sorkarin a duh a, Mizoram University thuneitute pawhin an duh a ni a ti a, Mizoram University Academic Council chuan hei hi MZU insawhngheh hnua hmachhawpah a dah bawk a, Union Human Resources Development Ministry-ah Lunglei Campus din tur hian \um engemawzat dilna an thlen tawh mah se, vawiin thlengin chhanna dawn a la ni lo tih a sawi.
Dr. Lalthangliana chuan, kumin February thlaa Union HRD Minister a hmuh \umin Lungleia Mizoram University Campus din chungchang hi a sawipui tih a sawi a, an inbiaknaah hian Union Minister hian tihhlawhtlin a lo tiam niin a sawi a, a taka hmalak a nih hmain Lok Sabha inthlanpui a awm a, inthlan zawhfel a nih hnuah Union HRD Minister chu mi hran ruat a nih leh tak avangin hmalakna a la awm leh rih lo a ni, a ti. Lungleia MZU Campus din tura an mutan ber chu Union HRD Ministry a ni tih sawiin, hei hi Mizoram sorkar chuan a ngaipawimawh a, a ngaihven reng a, MZU lam pawhin a theih ang angin an bawhzui ve reng mah se, tih theih an nei lo tih a sawi.
NIT Mizoram sorkar-in a ngaihtuah tawk lo nia lang chungchang zawhna chhangin Higher and Technical Education Minister chuan, NIT chu Mizorama zirna in pawimawh berte zinga mi a ni tih sawiin, ngaihven a \ul hle nia a hriat thu a sawi a. Tuna NIT Director ni mek chuan sawisel a hlawh hle a, thla khatah ni 5 vel bak a awm ngai lo nia sawi leh vawiin thlenga Campus mumal nei lova an la awm chu enfel a \ul hle a ni, a ti.
District hrang hranga Polytechnic dinna tur Building sak tawh tihhlawhtling tum a nih leh nih loh zawhna chhangin, Dr. Lalthangliana chuan, Sorkar hmasa-in hma a lo lak tawh hlawhchham tir mai chu a remchan loh avangin a tihlawhtling tura theihtawp chhuah tum a nih thu leh thil buaipui ngai awmte bawhzui a nih tur thu a sawi a. Hetihrual hian District hrang hranga Polytechnic dinna tur Building sak sa chu a zawhna a rei tawh hlawm a, Sorkar hmasa-in engemaw lai khan zirtirtu la turin ruahmanna a siam a, hei hi DR&AR in a pawm vek tawh hnuah nikum khan Cabinet \hukhawm chuan he ruahmanna hi a paih leh tak \hut avangin tun dinhmun hi an thleng ta a ni, a ti. Dr. Lalthangliana sawi danin, tunah hian H&TE Department hnuaiah Asst. Professor hnaruak 167 leh Non Teaching Staff hnaruak 69 a awm a, hengte hi hnawhkhah a nih phawt loh chuan Department tan chak taka hmalak a har a ni.
