Health Minister, Pu Lal Thanzara chuan vawiin khan Kolasib District Hospital-a mipuiten damdawi man tlawm zawka an lei theihna tur, Pradhan Mantri Bhartiya Jan-Aushadhi Kendra Store a hawng. Hawnna inkhawma thusawiin Health Minister chuan Prime Minister, Pu Narendra Modi-an mipuiten damdawi \ha man tlawm zawka an lei theihna tur Pradhan Mantri Bhartiya Jan-Aushadhi Kendra Store a siam chu mi harsa zawk leh BPL chhungkua amite tan chenfakawm tak a ni dawn niin a sawi a ni. Tun dinhmunah Mizoramah man tlawm zawka mipuite damdawi an lei theihna tur dawr 9 a awm tawh a, hetiang damdawi dawr hi District Hospital zawng zawngah hawng turin ruahmanna siam mek a ni a, Hruaizel Pharmacy chu Implementing Partner atan hmangin kumin chhung ngei hian District Hospital zawng zawngah hetiang damdawi man tlawm, quality \ha si zawrhna dawr hi din vek tum a ni a, Community Health Center thlenga dah zel tum niin a sawi bawk. Minister chuan hetiang damdawi \ha leh man tlawm, generic damdawi hi Doctor damlo entute pawhin an chawh a ngai niin a sawi a, Medical Council of India pawhin generic damdawi hmang tura an prescription ziak \hin turin doctor te a ngen niin a sawi a ni. Health Minister hian NEDP sum hmanga Kolasib District Hospital tih changtlunna tura khawl chi hrang hrang 22, Rs.94,98,400/- senga lei chu hman theih turin a hawng a ni. Minister hian Kolasib damdawi inah Trauma Center Rs. 4,90,00,000/- senga sak tum a nih thu a sawi bawk a ni.
