India chuan chona thar a hmachhawn a, Agra bulah virus kaite enkawlna hmun tur containment facility buatsaih mek a ni tih Health Minister hian a sawi a, Iran-a India mi zirlai leh sakhaw thila zin mekte chu sorkarin a ngai pawimawh hle a, Iran sorkar nen inbe pawpin a theih anga chaka hmalak a ni tih Vardhan hian a sawi.
internet kaltlanga thil leina chikhat, Paytm-a thawktu pakhatin coronavirus hi a kai thar leh avangin Paytm hian Gurgaun-a an pisa chu ni hnih chhung an khar a, ni hnih kalta chhung khan Italy a\anga India-a zin mi 15 ten virus an kai tih hmuh chhuah thar anih hnuah India-a virus kai zat hi an pung hluai a, tun thlengin Indiaah mi 29 in an kai tawh tih finfiah a ni tih Health Minister hian a sawi.
Prime Minister pawhin Coronavirus, Covid-19 khuahkhirh tura hmalakna hi a vilpui reng tih Health Minister hian a sawi a, minister rual, a vil zui tura ruat bikten nitin thil awmdan an vil reng a, state sorkar hrang hrangte nen pawh inbiakpawh reng a ni tih Union Health Minister hian a sawi.
India hian virus laka invenna turin Italy, Iran, South korea leh Japan a\anga khualzinte chu India an luh a khap rih a, Health Ministry chuan mipuite chu China, Iran, South Korea leh Italy ah te zin rih lo tuin thu a rawn a ni.
Congress hruaitu Ghulam Nabi Azad chuan sorkarin mipuite an chiai lohna tura a thlamuan a \ul a ni a ti a, tunah pawh mipuite an chiai nasa tawh a, sorkarin hma a lak vat a \ul a ni a ti.
