Durtlang Leitan-a SIRD&PR, Falkland-a Rajiv Awas Yojana, Mission vengthlanga SAI Centre leh R. Dengthuama Hall quarantine center te vawiina a tlawhnaah Health Minister hian he thu hia sawi a, state pawn atanga Mizorama rawn lut te chu uluk taka endik chhunzawm zel a tul tih a sawi a, mahni lirthei hmanga rawn haw te chu fimkhur tura chahin lirthei ke hnih nei chi te erawh chu fimkhur thilah luh remtih a ni rih lo tih a sawi.
SIRD&PR Residential hostel Durtlangah hian quarantine mi 29 an awm a, an zinga 14 te swap sample endik tawh te chu negative tawh a, harsatna dang an neih loh chuan chhuahtir thuai tum a nih bakah midang 15 te swap sample erawh lak ala ni lo a ni.
Falkland-a Rajiv Awas Yojana (RAY) building-ah BSF sipai 100 khung hran mek an ni a, an zinga 5 hi nizan khan an Positive tih hriat chhuah a ni a, ZMC ah enkawl tura lak an ni.
Health Minister hova thawk chhuak, Health Dept Consultative Committee member te hian BSF te chu sorkarin inkhung hran dan tur a ruahmante khauh taka zawm turin an hrilh a, an chhehvela awm khawtlang mipuite leh Local Task Force te nen harsatna an neih loh nan fimkhur turin an chah a ni.
