Vawiina World Cancer Day puala inkhawm Assembly Annex a neihah thu sawiin health minister chuan, cancer natna laka mipui te an him theih nan inzirtirna uar zawka kalpui a ngai a, ziak leh chhiar thiam tawk lo te pawh he natna laka an him theihna turin nasa zawka zirtir an ngai a ni a ti. Health Minister chuan mi\henkhat natna tawrh hnu chauha inenkawl nachang hria an awm \hin leh invenna lam ngaihthah an awm chu pawi a tih thu a sawi a, natna in taksaa bu a khuar ngheh hmaa invenna lam ngaihpawimawh nachang hriat a ngai a ni a ti a, Sorkar pawhin Health Care lam nasa zawka kalpui a tum tih sawiin SEDP ah pawh an dah pawimawh hle a ni a ti.
Dr R Lalthangliana chuan, Cancer natna hluar chho zel do turin sorkar bakah tlawmngai pawl leh Kohhran te nen \angtlanga beihpui thlak a ngai tawh a ni a ti a, tun hnaia DoNER Secretary a hmuhnaah Mizoram a Cancer Superspeciality & Resecre Center din tura hmalakpui a tum thu a lo hrilh tih a sawi.
Cancer leh a invenna tih thupui hmanga thusawitu NPCDCS State Nodal Officer Dr Eric Zomawia chuan, Mizoramah kumtin Cancer vei thar 1552 awm anga chhut nih thu a sawi a, kum 3 chhungin Cancer vanga thi 2176 an awm thu leh heng zinga 1346 chu mipa leh 830 chu hmeichhia an nih thu a sawi. Dr Eric Zomawia chuan, Mipa Cancer vei zingah pumpui Cancer a tam ber a, hmeichhe zingah chhulhmawr cancer an tam ber a ni a ti a, India ram pumah Mizoram chu Mipa leh hmeichhia Chuap Cancer tamna ber a nih thu leh Rilpui Cancer vei tamna ber a nih thu a sawi.
Dr Eric Zomawia chuan, Cancer natna vei lo tura inven theih a nih thu a sawi a, nunphung tihdanglam te, ei leh in fimkhur te a ngai tih sawiin zuk leh hmuam tih loh te, Thau lutuk lo tur a inven te, hri danna ngaihpawimawh te, Cancer vei leh vei lo in test fo te a pawimawh tih a sawi.
Inkhawm hi Nationl Health Mission Director Dr Lalrozama’n a kaihruai a, Health Principal Director Dr F Lallianhlira’n thu a sawi bakah kumin cancer day thupui ‘I am and I wil’l tih hmangin MSCI Medical Oncologist Dr Jeremy L Pautu in thu a sawi bawk.
