Zoram mipuite hnena thuchah a sawiah Health Minister hian hri leng mekin khawvel pum a nghawng avangin ram hrang hrangah leh India ram hmun hrang hrangah zirna in leh hnathawhna hmunte khar a \an a ni a. Hei vang hian mizo mipuite pawh Mizoram-ah an haw khawm ta mek tih a sawi a. Hetih hunlai hian fimkhur tlan leh zual a ngai ta a ni a ti a. He hrileng hi tun thlengin Mizoramah kai la awm lo mahse ram dang leh state dang a\anga rawn hawten an rawn hawn theih avangin inven \hat a \ul tih a sawi.
Pu Thangtea hian Mizoram pawn atanga thlawhtheihna leh lirtheia lo haw zawng zawngte chu hri leng mek an vei tih inhre lova an kai theih avang leh an tihdarh theih avangin Mizoram him nan, mahni inah ni 14 chhung tal inkhung rih turin a ngen a. Mizoram a him a, mipuite thlamuang taka an chenho zui zel theih nan huaisen tak leh Kristian taka, mizo rilru dik tak pua, ram leh hnam hmangaihna avanga, pawn chhuak lo turin Mizorama lo haw thar te chu a ngen a ni.
(Health Minster bite)
Pu Thangtea hian hri leng mek laka Mizoram a him theihna tur leh an kai an lo awm pawha enkawl thei turin sorkarin ruahmana a siam zel tih a sawi a, Chi-ai si lo, fimkhur tak sia awm a pawimawh hle a ni a ti a. He hrileng do letna kawnga Sorkar kut leh ke te, Mizoram mipui, tlawmngai pawl leh Kohhran te inpekna chu chhuanawm a tih thu a sawi a. Mipuite chu an hriselna enkawl uluk tur leh \ul tawpkhawk a nih loh chuan tumah zin chhuak lo tur leh pawn chhuak lo turin a ngen a ni. Health Minister thuchah hi Chanchin thar puan zawhah tih chhuah a ni ang.
