Vawiina Hnam Run-a inkhawmah thusawiin, Dr. R. Lalthangliana chuan, Assembly inthlanna Congress tlinna bial 5 Hachhek, Thorang, Lawngtlai West, Palak leh West Tuipuiah |angrual candidate khan vote a hmu tlem zawk vek a ni, a ti a. Nikum kumtawpa Assembly inthlana ZPM leh Congress vote hmuh belhkhawm chu 3,27,016 a ni a, kumina Lok Sabha inthlanna neihzawh takah erawh hei hi an pha lo hle a, an vote hmuh belhkhawm chu 2,16,146 a nih tih sawiin, nikum inthlana Party pahnih te vote share chu zaa 53 a nih laiin MP inthlana an vote share chu zaa 43.26 chauh a ni pha tih a sawi a. Hetiang a nih lai hian MNF party erawhchu hmasawn zawngin an kal a, nikum inthlana an vote hmun zaa 37.58 chu kumina MP inthlanah chuan zaa 44.89 a tling phah tih a sawi. Dr. R. Lalthangliana chuan, Congress-in kum 10 thuneihna an chan chhungin hna chhunzawm tlak thil tih an nei nual tih a sawi a, Medical College hmabak tam tak neia an kalsan leh Lungleia Engineering College, Quarter, kawng leh tui la awm lote pawh buaipui a nih thu sawiin, kum 10 chhung Congress Sorkar-in a ngaihthah tawh Aizawl Municipal Corporation pawh a dintu MNF ngeiin hmathar a lakpui dawn a ni, a ti.
Kumin February ni 27 khan sorkar laipuiin RIPANS tihchangtlunna atan Mizoram sorkar hnenah cheng nuai vaibelchhe 480 leh nuai 12 a rawn pe tih sawiin, Dr. R. Lalthangliana chuan, he sum hmang hian Damdawi in changtlung tak din a nih tur thu leh hna 140 vel lak a nih tur thu a sawi a. Mizoram College zirtirtute hlawh punnaa kum 2016 January ni 1 atang kumin March ni 31 thlenga Arrear an lak tur Sorkar hmasain a nawr hlawhtlin theih loh Rs. vaibelchhe 39 chuang pawh tunhnai khan nawr chhuah a ni tih sawiin, Sanction Order pawh hmuh a ni tawh tih a sawi.
Inkhawm hi an pawl General Secretary Pu C. Tawnvela’n a kaihruai a ni.
