South Tuipui bialtu, Health Minister Dr R Lalthangliana hian vawiin khan Hnahthial tlawhin, District thuneitute a kawm a, Mizoramah mipui khuahkhirhna thupek thlahdul anih laiin, India ram leh thenawm State ah te Covid 19 vei hmuh chhuah an la pung zel a, inthlahdah theih a la ni lo tih a sawi. Hnahthial leh District hrang hrangah covid-19 enna khawl TrueNat dah thuai tum a nih thu Health Minister hian a sawi a, he khawl hmang hian natna chi hrang hrang 16 a test theih dawn a, ni khatah sample 50 vel test theih a ni ang a ti. Health Minister hian Hnahthial chu Covid 19 kai awm lohna District a nih avanga lawmpui nan cheng nuai 1 a hlan a, Damdawi In hrang hrangte hnenah hmanraw thenkhat a hlan bawk.
Hemi hmalam hian Health Minister hian amah tawiawmtu Sports Minister Pu Robert Romawia Royte nen Hnahthial HBSC Ground No 2-a phullem phah hna thawh mek an enfiah a, Phullem phah hna hi NEC atanga sum hmuh cheng nuai 663 sengin Lushai Engineers, Ramhlun South Aizawl ten an thawk a ni. Sports Minister hian Hnahthial-ah Tourist Lodge leh Sports Complex tur ruahman a nih thu a sawi.
