Health Minister hian Covid-19 en theihna khawl bun thei turin Laboratory changtlung tak, Biosafety level 3, BSL-3 lab tia sawi chu neih hmasak a ngai tih a sawi a, ZMC in Medical Council of India enfiahna a paltlang theihna turin he laboratory hi ngaihpawimawh zinga awmsa a ni a, National Centre for Disease Control NCDC leh Department of Health Research ah te ruahmanna kimchang thehluh a lo ni tawh a, a puitlin hmain Covid-19 chuan Mizoram a nangching ta a ni a ti a, Chief Minister pawhin a ngaih pawimawh avangin BSL-3 lab nei tur leh Covid-19 test theihna khawl bun turin chak leh zuala hmalak a ni a ti.
Dr Thangtea chuan Covid-19 vei leh vei loh enfiah tura Ministry of Health and Family Welfare in a tih chin te chu a hluarna rama kal, insawiselna nei te, covid -19 kai damlo bul hnaia lo khawsa emaw, covid-19 vanga damlo enkawltu, damdawi lam hnathawktu, insawiselna neite chauh an nih avangin tun dinhmunah Mizoramah test ngai an la tam lo hle tih a sawi a, Test tur Sample te chu Guwahati leh Kolkata ah te awlsam taka thawn theih a nih tho avangin test chungchangah chuan harsatna Mizoramin a nei lo a ni a ti.
