State leh state inkara veivak lirthei khaltu leh handyman te hri leng an kai em tih endik an rel a. Health Minister hian Mizorama Paramilitary force hrang hrang Assam Rifles, BSF, CRPF leh sipai dang te bakah loh theih lova Mizorama hnathawk tura state pawn atanga chah luh ngaite chungchang uluk zawka ngaihtuah a tul tih a sawi.
Tun hnaia Lungleia BSF te leh Aizawla NDRF awm te zinga Coronavirus kai hmuh chhuah a awm chungchang sawiho a ni a, heng mite hian mipuiah an putdarh lohna tura khauh zawka ruahmanna siam tul an tih thu an sawi a, Sipai ten quarantine an kalpui tha tawk em tih leh hri leng laka invenna an zawm tha em tih enfiah tul an tih thu te, Sorkar leh mipui mamawhna vanga phai atanga mithiam chah luh ngai an awm thulhah a chahluttu ten man chawia inkhunghranna tur leh an cham chhunga an zawm tur inkaihhruaina tha taka an zawm theih dan tur te an sawiho a, tangkhang ni si lo, thil pawimawh dang avanga state leh state inkara veivak te, district leh district inkara veivak ten hri leng an kaidarh lohna tura ruahmana siam chungchang te pawh an sawiho a ni.
Thutkhawmnaah hian Medical Operational Team hruaitu Dr ZR Thiamsanga, Social Welfare Minister Dr K Beichhua, Chief Secretary, Health Secreretary, Police hotute leh sorkar mipawimawh dangte an tel a ni.
