Health Department bultumin World Malaria Day vawiin khan hman a ni. A hmanna inkhawm lian ber, tukin a Govt. Mizo High School Field-a neihah Healhth Minister Pu Lal Thanzara chuan, Sorkar laipuiin kum 2030 ah India chu Malaria awm tawh lohna ram a siam a tum tih a sawi a, hemi zulzui hian Mizoramah pawh Health Department in theihtawpin hma a la a, he ni hmanna thupui, Malaria hneh turin I inpeih ang u tih chu tih hlawhtlin tum turin mipuite a ngen a ni. Pu Lal Thanzara chuan, Health Department in kum 2016 khan thosilen damdawi a chiah 5,29,000 a thlawnin a sem tih a sawi a, heng thosilen te hi vawi 20 suk pawh a damdawi thi lo tura ngaih niin a sawi a ni. Pu Lal Thanzara chuan, Malaria chu thihna thlen thei ni mah se hmuh chhuah hma a nih a enkawl vat a nih chuan awlsam taka tihdam theih a nih thu a sawi a, inringhlel te chu rang taka an thisen endik tir vat tura chahin PHC, CHC leh Sub-Centre-ah a thlawna thisen endik tir theih a nih thu leh damdawi pawh a thlawna lak theih a nih thu a sawi. Pu Lal Thanzara hian World Malaria Day puala Two Wheeler Rally a vailiam nghal a ni.Sorkar chhinchhiah danin nikum khan Mizoramah Malaria vei mi 5,715 an awm a, mi 4 in an thih phah bawk.Inkhawm hi National Health Mission Director Dr Lalrozama’n a kaihruai a Principal Director Dr F Lallianhlira’n thu a sawi bawk.
