Guwahati Central Jail jammer vuah dawn

Assam CM, Sarbananda Sonowal-a’n Guwahati Central Jail-a mi tangte zingah lung in chhunga a ruka mobile phone hmang thin an awm tawh loh nan cellphone signal kal tlang theih lohna, jammer vuah thuai turin lung in hotute a hrilh a, Assam-a lung in hrang hrang enkawl dan chu siam that a ngai tih sawiin, lung in chhunga inkhuahkhirh dan pawh ennawn a ngai niin a sawi. Mi tangte zingah hian mi pawimawh leh langsar tak takte pawh an awm avangin, lung in enkawltuten an duhsak dan pawh en ngun a ngai tih a sawi a, mi langsarte pawh lung in danin a huam vek tur a ni tih sawiin, tute emaw lo duhsak an awm chuan, na taka hrem an nih tur thu a sawi bawk. CM chuan Guwahati Central Jail-a kum thum thawk tawhte chu sawn vekna tur leh, thawktu rinawm leh rintlakte dahna tur thupek a siam bawk a ni. Pu Sonowal-a chuan, Guwahati Central Jail hung chhunga thil awm dan enna tur, CCTV thlalakna pawh rang taka vuah ni se a ti a, hemi rawtna hi Home Department hnena thlen thuai turin IG Prisons chu a hriattir bakah, Door Frame Metal Detector leh khawl hmanga invilna hmanraw dang pawh vuah thuai tur a nih thu a sawi.