Heng mi pahnihte hian Lawngtlai an panna kawngah June ni 29 khan Thenzawl restaurant pakhata an chawlh bakah a bul dawrah thil an lei a. Coronavirus an kai tih hriat chhuah a nih tak avangin Pathianni zan atang khan Thenzawl mipuite hi an inkharkhip nghal a. Heng mi pahnihten an hnimhnaih theih awma ngaih mi 12 te sample chu ZMC Laboratory ah endik nghal a ni a, nizan khan an result hriat a ni a, an negative vek a ni. Sample hi ni 5 hnuah ennnawn leh tur a nih avangin Thenzawlah hian mipuite an la inkharkhip chhunzawm mek a ni.
Lawngtlai Distrit mi pahnihte laka FIR an thehluhah hian Thenzawl Town Task Force chuan heng mi pahnihte zalen taka an duh dan dana kalkawnga an khawsa thei chu Dan bawhchhiatna nia an hriat thu an tarlang a, sorkarin inkhung hrang tura a tih an ni tih hre chunga midang himna ti derthawng leh midang nunna atana hlauhawm an thlen te, midang ti thlabara harsatna an thlen avang tein Dan an bawhchhiatna leh midang tana pawi an thlen dan chhui chhuaka Dan anga an chunga hremna lek turin Police te chu an ngen a ni.
