Hindu sakhaw pawl pakhat, Dera Sacha Sauda hotu, Gurmeet Ram Rahim Singh-a, pawngsual thubuaia thiam loh chantir a nih avanga Punjab, Haryana leh Delhi-a buaina chhuakah mi 31 an thi a, mi dang 250 vel an hliam a, rel, motor leh thil dang tam tak hal a ni. Haryana-a Sirsa khawpuia Dera Sacha Sauda hmunpui bulah phei chuan sipai leh police tam tak bakah, Gurmeet-a hnung zuitu, mi nuai khat vel an pungkhawm nia sawi a ni a, Union Home Minister, Rajnath Singh-a chuan vawiin khan sorkar mi pawimawhte kawmin, he thil thleng chungchang hi a sawipui a, Home Secretary, Rajiv Mehrishi leh Intelligence Bureau hotu, Rajiv Jain-a’n he thil thleng kaihhnawiha Haryana, Punjab, Chandigarh, Delhi, Rajasthan leh Uttar Pradesh-a thil awm dan kimchang an sawifiah a, National Security Adviser, Ajit Doval leh ven himna lam hotu liante an tel a, Haryana leh Punjab hmun tam takah curfew puan a nih bakah, Uttar Pradesh-a district 9-ah pun khawm khapna thupek siam a nih thu pawh sawi lan a ni. Haryana, Punjab leh Chandigarh-a mipui nun ralmuanna vawng turin paramilitary force 20,000 vel rawih an ni a, anni hian tualchhung Police-te an pui a ni.
Nizan khan Dera Sacha Sauda mi 15 vel chu police-in an man a, Ambala, Kurukshetra, Karnal, Kaithal leh Panchkula-a he pawl hmunte pawh khar nghal a nih bakah, heng hmunte hi dap theihna thupek siam a nih thu, Haryana sorkar hotute chuan an sawi. State pathuma buaina chhuakah hian lirthei, petrol pump, rel leh rel dinna engemaw zat hal leh tihchhiat a ni a, chanchinbu mite pawh beih an ni a, he thil thleng avang hian Punjab and Haryana High Court chuan Haryana CM, Manohar Lal Khattar-a kaihhruai sorkar chu na taka khakin, politics thila hamthat tumah a puh a, Panchkula-in a tuar ta niin a sawi. PM, Narendra Modi-a chuan he tharum thawhna thleng hi demawm a tih thu leh, pawi a tih thu a sawi a, PM pisa chuan sorkar laipui leh state sorkar thuneitute chu dan leh thupek ken kawh a, buaina tihtawp a nih theih nan chawl lova thawk turin a hrilh a ni.
Vawiin chawhnu lamah khan Haryana, Sirsa khaw daifema Dera Sacha Sauda hmunpui chu sipaiten an hual a, a hung chhung erawh chu an lut nghal lova, 33 Division GOC, Major General Rajpal Punia chuan, he pawl hmunpui hung chhung hi luhkhung nghal an tum lo tih sawiin, he hmun hi chhuahsan turin he pawl mite hi an thlem phawt dawn tih a sawi. Hemi hma hian sipaite, Rapid Action Force leh state police-te chu Dera campus velah hian an pung khawm nasa hle a, an hotu, Gurmeet Ram Rahim, pawngsual thubuaia thiam loh chantir a nih avanga lungawi lova pung khawm, he pawl mi, nuai khat zet chu hnawh darh an tum nia sawi a ni a, Haryana Chief Secretary, DS Dhesi erawh chuan tharum hman mai tumna a awm rih lo tih a sawi. Haryana Additional Chief Secretary (Home), Ram Niwas-a pawhin, he state chhunga Dera Sacha Sauda hmun zawng zawng chu dapna tur thupek siam a nih thu a sawi a, ralthuam leh sorkar khap thil a awm leh awm loh en fiah a nih tur thu a sawi. Kurukshetra district-a he pawl hmun pakua pawh Police-ten an khar a, a hmuna lo awmte pawh an chhuahtir a, tiang 2,500 leh hriamhrei chi hrang hrang an man a ni.
Puan tawh angin, a zuituten pathian ang hiala an ngaih, Gurmeet Ram Rahim Singh hi pawngsual thubuaiah nimin khan Panchkul-a CBI court-in thiam loh a chantir a, Rohtak-a Sunaria jail-ah khung nghal a ni. Haryana DGP (Jails), KP Singh chuan Rahim Singh-a hi lung inah mi tang dang ang bawka enkawl a nih thu a sawi a, a chet dan engkim, mi pali-in an vil reng tih sawiin, mi tang dang ang bawkin chhuatah a mu tih a sawi. Mi tangte chu an mi hmuh duh, mi 5 thlantir thin an ni tih sawiin, Ram Rahim-a pawh hi thlantir a nih tur thu a sawi bawk. Thiam loh chantir a nih rual khan sorkar ven himna sang ber, ‘Z-plus’ pawh hlih nghal a ni tih Haryana Chief Secretary, DS Dhesi chuan vawiin khan Chandigarh-ah a sawi a, lung in chhungah boruak tihdaihna, air conditioner pek nia sawi pawh thu dik lo a nih thu leh, chaw pawh mi tang dangte ei ang chiah pek a nih thu a sawi a ni.
