Gurmeet Ram Rahim Singh-a aiawh tur an pawl thuneitu tur ngaihtuah mek

Hindu pawl pakhat, Dera Sacha Sauda hotupa, Gurmeet Ram Rahim Singh chu a pawla hmeichhe pahnih pawngsual thubuaiah kum 20 tang tura tih a nih tak avangin, Haryana-a Sirsa khuaa an pawl hmunpui enkawlna kawnga thuneitu tur buaipui mek a ni a, he pawlah hian mi vbc. tél an tel a ni. Kum 2007-a pawngsual thubuai siamsak a nih khan, Gurmeet Ram Rahim Singh-a hian a fapa, Jasmeet Singh Insan chu a hmun luah turin a lo ruat tawh a, mkahse kum 10 lai a liam tawh avang leh, thil awm dan a danglam tawh avangin, a fapa hian he dinhmun chuhpuitu pahnih a nei tawh a, pakhat chu Gurmeet Ram Rahim Singh-a fa lak, Honeypreet Insan-i a ni a, a pa laka tlatlum ber ni hiala sawi, khawi kipa zuitu a ni a, mahse Police ten man tumin an zawng mek a ni. Pakhat leh chu he pawl hotu ber dawttu ber ni lai, Brahmachari Vipasana a ni a, kum 35 mi chauh ni mah se, Ram Rahim-a hian a zin bo apiangin an pawl hi a kutah a dah thin nia hriat a ni. Dera pawl hi an lianin an hausa hle a, cheng vbc. 5,000 vel chu neia ngaih an ni a, Sirsa-a an hmunpui pawh hi ram, acre 700 vel a ni a, damdawi in changtlung tak, zirna in, bazar Olympic stadium tiat auditorium, ran vulhna leh thlai hmun zau tak an nei a ni.