Gurgaon-ah school naupang, kum 7 mi thah a ni

Delhi bul lawk, Haryana-a Gurgaon-a Ryan International School-ah mipa naupang pakhat, kum 7 mi chu inthiarna pindanah Bus Conductor-in a that nia sawi a nih avangin nu leh pa leh mipui an lungawi lo hle a, he school Acting Principal, Neerja Batra chu a hna atanga chawlhtir nghal a nih bakah, he sikul vengtu atana rawih, private agency pawh chawlhtir nghal an ni. Nimin tuk khan he naupang, pawl hnih zirlai ruang hi chhar a ni a, nu leh pa za tam tak thinrimin he sikul hi an hual nghal a, he naupang lainatawm tak hi he Bus Conductor hian khuaikhem a tum ngei nia hriat a ni. He thil thleng chhui zui tur hian Special Committee din nghal a nih thu, Gurgaon Police hotu, Simardeep Singh-a’n a sawi a, ni 7 chhunga chhui zo hman tura tih an ni. Haryana Education Minister, Rambilas Sharma chuan pawi khawihtu chungah hian zah ngaihna lantir a nih loh tur thu a sawi a, bus conductor, Ashok-a an tih pawh hi nizan khan man a ni a, court-a hruai a nih hnuah Police-te kutah ni thum chhung awm phawt tura tih a ni. Police ten he sikula thawk te, nu leh pa te, zirlaite pawh thu an zawt fiah tawh a, nu leh pate chuan he thil thlengah hian Conductor man ringawt an duh tawk loh thu leh, he sikul hian mawh a phur ngei nia an ngaih thu an sawi a, he naupang thi ta pa hian vawiin khan Gurgaon Police Commissioner hmuin, he sikula inenkawl dan tha tawk lo hi thunun ngaia a hriat thu a sawi a, a fanu pawhin he sikulah hian pawl 5 a zir mek tih a sawi. Niminah khan he sikula zirlai nu leh pate lungawi lo chuan he sikul hi luhkhungin, thil tam tak an tichhia a ni.