GST hnuaia GSTR chhiah chawi tur inziah fel theih hun chu khar a ni tep tawh, zirmite beisei aiin chhiah chawi tura inziaklutte an la tlem

Ram puma chhiah lak dan thar, Goods and Services Tax hnuaia GSTR-1 chhiah chawi tur inziah fel theih hun chu khar a ni \ep tawh a, zirmite chuan beisei aiin chhiah chawi tura inziaklutte hi an la tlem hle niin an sawi. Puan tawh angin sorkar laipui chuan GSTR-1 chhiah chawi inziah fel hun hi July ni 1 khan thla hnih dang a lo pawh sei tawh bakah, inziak lut duh an pun theih beiseiin, inziak lut tlaite chu ni khata cheng 100 zel chawitur a tumna pawh chu a sut leh a, heti chung hian GSTR-1 chawi tura ngaih mi nuai 65 vel zinga nuai 40 vel chauh an inziak fel tih a sawi a ni. Mi thiamte chuan hei hi miin chhiah awl ruk an tum vang emaw ai mahin, GST enkawlna tur khawl a la famkim tawk loh avangin, heng mite bungraw lei leh hralhte hi a inchhinchhiah fel loh vang niin an sawi a, GSTR-3B chhiah pawh Finance Ministry-in a ziah dan chuan August thla-ah mi 100 zelah 64-in chhiah chawi tura an inziah fel laiin, September thla chuan mi za zelah mi 55 chauh inziak fel ang a nih thu an sawi a, hei hian sorkar laipuia chhiah lut pawh a titlem hle tih an sawi. GST enkawlna khawl ching fel tur hian Union Finance Minister, Arun Jaitley chuan Bihar Deputy CM, Sushil Modi-a kaihhruaiin committee a lo din tawh a, October thla chhung hian khawl hrang hrang leh a kaihhnawih thil fel lo lai awm theite tifel vek turin hun pek an ni.