Govt. J. Thankima College leh Pi B. Lalhmangaihi Chaltlang Dingdi vengin ram an inchuh laia in ding, Pu Lalhmingliana-te chhungkaw luah lai chu nimin chawhma dar 11:40 vel khan a luahtute awm loh laia tih chhiat a ni a, Govt J Thankima Collge hotute chuan an zirlaite tih chhiat ni theia an hriat loh thu an sawi.
Bawngkawn Brigade-a rama Pu Lalhmingliana-te in luah lai thiah a nih chungchang hi Govt. J. Thankima College hotute chuan an hriatpui lo niin anmahni kawmtu Zonet palai an hrilh a. Tun thla ni 3 khan an College zirlaiten he in hi thiah lo tum tawh mah se, tuna a thiah hun nia sawi nimin kha Sorkar chawlh a nih avang leh College kai tumah an awm loh avangin an zirlai naupangte tih ni theia an ngaih loh thu an sawi a ni. An College ram hi kum 2013-a Sorkar-in kum 99 chhung luah hawh atana Land Lease a pek a ni tih College hotute chuan an sawi a, tun hmaa helai hmuna ram nei anga inchhalte chu lehkha lem hmangah an puh a ni. College hotute chuan, an College ram chhungah inhmun nei nia insawi an awm avangin harsatna an lo tawk tawh thin tih an sawi a, an College ram humhalh hnatlang pawh an lo nei tawh tih an sawi. He rambuai chungchang hi kum 2016 khan Aizawl District Magistrate hnenah chinfel sak turin an ngen a, hemi kum February ni 25-ah Aizawl Sub-Deputy Commissioner & Zonal Magistrate-in enfiahin, Pu Lalhmingliana-te chhungkua chu March thla ralhmaa inthiar chhuak turin a hriattir a ni an ti a, Pu Lalhmingliana nupui Pi Ramfangzauvi chuan inthiarchhuak tura intiamna a ziak niin an sawi bawk a, hei hi Pi Ramfangzauvi-te hian an tih hlawhtlin loh avangin an College Principal hmingin thuneitute chu hma laksak turin an ngen leh chungin, hmalak zui a ni ta lo niin an sawi. An ram inchuh chungchangah hian Pi B. Lalhmangaihi-te chu Court-ah tum 4 an zualko tawh niin an sawi bawk a, tum 2 inhukdawkin, tum 2 chu Court-in thiam loh a chantir tawh niin an sawi a, High Court-a an zualko-na pawh Court-in thutlingah a pawm sak lo niin an sawi. Govt. J. Thankima College hotute chuan, tuna inthiah tak bakah hian mi 3-in an ram chin nia ngaihah in an sa mek niin an sawi bawk a, an ram chin chu teh tha tur hian Land Revenue and Settlement Drepartment hotute pawh an ngen tawh niin an sawi bawk. He thil thlen dan hi Aizawl Municipal Corporation (AMC) hotuten vawiin khan an enfiah a, dan lova insa nia ngaih chhungkaw 10 zet chu chawlh rih turin Stay Order an pe niin College hotute chuan an sawi bawk.
In tih chhiat tak luahtu, Pu Lalhmingliana nupui Pi Ramfangzauvi chuan, an in thiah a nih lai hian a pasal nen in-ah an awm lova, an fate 3 chiah an awm niin a sawi a. An in thiattute chu mi 10 vel an nih thu leh heng mite hi tutenge an nih hre lo mah se, tun hmaa J. Thankima College nen an lo intih thiam loh tawh dan ngaihtuahin a thiattute chu he College zirlaite an nih a rin thu a sawi. Pi Ramfangzauvi chuan, helai hmunah hian kum 2010 vel atang khan an awm tawh tih a sawi a, a ram neitu Pi B. Lalhmangaihi in sak sa luah ve mai niin an in sawi. Aizawlah belh tur dang an neih loh avangin an chenna chu thiah ni mah se, a theih chen chen an la awm rih a ngai tih a sawi a, nizan pawh khan an hmelhriatte ina an riak ve mai niin a sawi. Vawiina Zonet palaiin an chenna hmun a tlawh lai hian Pi Ramfangzauvi-te nufa hian an in thiah takah hian eirawng an lo bawl mek a ni. He thil thleng chungchangah hian nimin khan ram neitu, Pi B. Lalhmangaihi chuan Bawngkawn Police Station-ah FIR a thehlut nghal a ni.
———————
Gauhati High Court Aizawl Bench chuan Pi B Lalhmangaihi writ petition thehluh hnawlin, a duh anih chuan Civil Court lamah a kal leh thei ang a ti. He thubuaia court thutlukna tlangpui chu hetiang hi a ni.
(Government J.Thankima College ram tura sorkar-in ram a pek chhunga ram neitua insawi, Pi B Lalhmangaihi hian College ram tana a ram lak sak nia insawiin, Writ Petition hmangin sorkar chu zangnadawmna pe turin Gauhati High Court-ah a khing a. Court Paper atanga a lan danin Pi B Lalhmangaihi hian House Pass pahnih, House pass no. 41/1970, 03.04.1970-a a pasal hminga pek chhuah leh VC Pass No.71/1973, kum 2008 March ni 10-a an leite chu dan ang thlapa sorkar pek chhuah nia a sawi laiin, Sorkar lam ukil te chuan, Brigade ram chu 09.06.1960-a Mizo District Council in protected area-a a puan a nih avangin, Chaltlang South VC chuan House Pass pek chhuah theihna a nei lo a ni an ti ve thung a. Govt. J Thankima College tana ding ukil chuan ram neitua insawite hian Civil Judge Court leh Sr. Civil Judge Court ah te pawh an ram chungchangah hian thubuai lo thehlut tawh mahse, thutlukna siam a nih hmain an hnukdawk leh ve ve a, thil awmdan kimchang tarlang lovin High Court ah hian writ petition an thehlut a ni a ti ve bawk. Heng thilte a ngaihtuah hnuah High Court chuan kar kalta Zirtawpni khan thutlukna siamin, Pi B Lalhmangaihi ram neih hi dan angin a tling zo em tih finfiah hmasak ngai a la awm avang leh hei hi Writ Petition anga ngaihtuah a rem loh avangin Writ Petition chu a hnawl a ni. Hetihrual hian High Court chuan ram neitua insawi Pi B Lalhmangaihi hian danin a phal a nih chuan Civil Court lamah a lungawi lohna a thlen thei ang tih a thutlukna siamah hian a tarlang tel thung. Hetianga High Court in thutlukna a siam atanga a ni 4 na, nimin khan helai ram inchuh laia in chu tih chhiat a ni ta a ni.)
