Karnataka Health Minister, B Sriramulu chuan Bengaluru damdawi inah Google hnathawk hi dah hran a, enkawl mek a ni tih a sawi a, amah hnaihtute chu chhui mek an ni tih a sawi bawk.
Google chuan a hnuaia hnathawk Covid-19 vei hi Bengaluru-a an pisa-ah hunrei lote chhung chauh a awm hman tih a sawi a, a hnuaia hnathawktu dangte chu in lama hnathawk turin an hriattir tih a sawi bawk.
Ram chhunga coronavirus vanga thi hmasa ber nia chhinchhiah chu Karnataka-a cheng a ni a, kum 76 mi niin Saudi Arabia-a zin, tun hnai lawka rawn haw a ni a, Ningani khan a thi a ni.
Hetihlai hian India mi 120, Iran-a awm te chu Air India thlawhna hmangin Rajasthan Jaisalmer-ah phurh thlen an ni a, sipai damdawi inah khung hran nghal an ni. Heng mite bakah hian Iran-a India mi la tangkhang mi 250 vel chu tun thla ni 15-ah Iran a\angin an hruai chhuak leh dawn a ni. Jaisalmer, Suratgadh, Jhansi, Jodhpur, Deolali, Kolkata leh Chennai-ah te Coronavirus vei tamna ram a\anga India mi hruai haw te dah hranna tur sorkarin a buatsaih a ni.
Karnataka Chief Minister, BS Yediyurappa chuan minister leh mi pawimawh dangte kovin emergency meeting a neihpui a, Karnataka-a zirna in zawng zawng, bazar te leh vantlang hmun te chu coronavirus a \aidarh zel loh nan khar ni se an ti a, Delhi sorkar chuan mipui vantlangin an inhman\awm swimming pool zawng zawngte chu khar vek turin a hriattir a, thupek hi tun thla ni 31 thleng hman a ni ang a, coronavirus a \aidarh zel chuan khar hun chhung pawhsei a ni ang.
Delhi sorkar hnuaia health dept. chuan hotel zawng zawng swimming pool te pawh hman theih loh tura dah turin hotel neitute an hriattir tawh bawk. Hei bakah hian cinema hall leh zirna inzawng zawng, exam-na bei lai tih loh chu tun thla ni 31 thleng khar lailawk turin sorkar chuan thuchhuah a siam bawk a ni. CRPF chuan vawiina an din champha lawm an tum chu coronavirus leng vang hian an \hulh a, hri leng \aidarh dan a zirin karleh lamah hman an tum a ni.
Hetihlai hian Congress hruaitu Rahul Gandhi chuan coronavirus laka ram a him theih nana hnathawk \ha tawk lovah sorkar laipui chu a puh a, khauh taka venhimna lam a kalpui loh chuan ram chhung sum dinhmun a chhiat phah thei a ni a ti bawk.
