GJM chief coordinator hlui, Bimay Tamang-a chuan amah thah tuma phiar ru an awm niin a sawi

Gorkhaland state thar siam ngiat avanga tiam chin awm loa nawrhna, ni 12 chhung tihtawp lailawk a rawt avanga Gorkha Janmukti Morcha atanga hnawhchhuah, Binay Tamang-a chuan amah thah tuma phiar ru an awm niin a sawi a, heng mite hian silai kap thiamte pawh an ruai niin a sawi. Puan tawh angin, thla hlui ni 31 khan GJM chief coordinator hlui, Tamang-a hian vantlang inkhawmah Darjeeling-a nawrh huaihawt chu ni 12 chhung tihtawp lailawk a nih tur thu a puang a, he thil avang hian GJM Central committee chuan Tamang-a leh a thurualpui, Amit Thapa chu an pawl atangin a hnawtchhuak a ni. Nimin khan Tamang-a hian amah thah duhtuten Nepal atangin silai kap thiam pahnih an ruai niin a sawi a, thah tuma phiar rutu hi tute nge an nih sawi lang lo mah se, state sorkarin thubuai a siamsak vanga bibo, GJM President, Bimal Gurung-a a nih rinawm hle nia sawi a ni a, Gurung-a hi Sikkim-ah a biru mek nia sawi a ni. Thuthar lakhawmtute hnenah Tamang-a chuan, eirukna thila inhnamhnawih, GJM hruaitute thil tih dan puan a tum thu a sawi. Nimin vek khan GJM Central Committee member pakhat, Rohit Thapa-a chu July ni 30-a Alipurduar district-a buaina chhuakah khan tharum thawh tura mipuite fuihpawrha puh a nih avangin police-ten an man a, Thapa-a hi thla hlui ni 29-a West Bengal CM, Mamata Banerjee-i leh GJM hruaituten he nawrhna-in harsatna a thlen chungchang an sawihona-ah khan a tel a, amah hi Gorkha Territorial Administration Chairman hlui a ni.