Sorkar hriattirna hi nimin khan tih chhuah nghal a ni a, hemi ang hian zu pawh zawrh chhuah leh nghal a ni ang. Zu khapna dan thar, The Mizoram Liquor (Prohibition) Act 2019 chu Mizoram Assembly in pass tawh mahse, Lok Sabha inthlanpui vuakvet-a Model Code of Cunduct in a phuar avangin Election Commission chuan he dan thar hi inthlan zawhfel ni tur, May ni 27 hma chu hmang rih lo turin March ni 28 khan Mizoram sorkar a hriattir a, hetihlai hian Mizoram sorkar chuan Zu zawrh phalna a pek, Bonded Warehouse neitute leh a zuar chhuaktu Vendor te hnena license a pek, March ni 31-a tawp tur chu renew a remtih loh avangin Mizorama Bonded Warehouse neitu pathumte chuan Gauhati High Court Aizawl Bench ah Writ Petition thehlutin, zu khawl khawmsa an neihte tih ral theihna hun siamsak turin an ngen a ni.
Gauhati High Court Aizawl Bench Judge, Justice Michael Zothankhuma chuan he thu hi ngaihtuahin Inrinni khan rorelna a ti chhuak a, Mizoram sorkar chu zu khapna dan thar hman theih a nih hma, May ni 27 thlenga Bonded warehouse leh vendor te license renew sak turin a ti a ni.
