Motor neituten sorkar thupek anga Garage an neih leh neih loh chu nizan a\ang khan enfiah \an a ni. Puan tawh \hin angin nimin, December ni 1 kha Aizawl khawpui chhung tawt lutuk tihziaawmna atana Traffic Management Coordination Committee-in Aizawla motor nei zawng zawng, Garage nei vek tura hun a pek tawp ni a ni a, hemi bawhzui hian Traffic Management Coordination Committee hnuaia Working Group Member-te, Transport Department Enforcement Team, Traffic Police leh veng hrang hranga Local Council hruaitute chu nizan dar 8 khan Aizawl SP Pisa tualah kal khawmin, Working Group Committee Chairman, Pu Lalbiakzama chuan a dahna hmun tur ni lova lirthei a awm leh awm loh endikna chu \an a nih thu a puang a, heng mite hi hlawm 5-a in\henin Garage nei leh nei lo hi an enfiah a ni. Zonet thu dawn danin, nizana an enfiahnaah hian kawngpui sira motor dah 130 man a ni a, chungte chu Chanmari West-ah 85, Chhinga Vengah 29, Saron Vengah 9, Zarkawtah 2 leh Bawngkawn South-ah 5 a ni a, heng lirtheiah hian man a ni tih hriattirna lehkha belin, a number chhinchhiah zel a ni a, a neitute chu Aizawl Traffic Control Office-ah inhriattir tur leh Motor Vehicle Act Section 179-na angin Rs. 500 chawi tura tih an ni. Zawhna chhangin Traffic SP, Pu C. Lalthanmawia chuan, endikna hi zan tin chhunzawm thei dawn lo mah se, a khat tawkin veng hrang hrangah kawngpui sira motor dah hi enfiah \hin a nih tur thu a sawi a. Hei bakah hian Traffic Police duty-ten motor leh lirthei dang tlan chhuakte chu tidingin an awmna veng Local Council-in a pek chhuah, garage an nei tih lantirna certificate nei lote chu MV Act-in a phut angin pawisa chawitir \hin a ni dawn tih a sawi. Pu C. Lalthanmawia chuan, Aizawl khawpuia lirthei tawt lutuk tiziaawm tur leh motor neitute dan zawm tura ngenna hi thlahdul theih a ni tawh lo tih sawiin, a \ul dan a zirin ken kawh zui zel a nih tur thu leh an thil tum tihlawhtling tura mipuite zirtir turin Traffic Police chu an khauh telh telh dawn niin a sawi a. Aizawl khawpui chhunga veng \henkhata Local Council, an veng chhunga lirthei neiten garage an neih leh neih loh la enfiah fel lo leh certificate la pe zo lote pawh tifel thuai tura beisei an nih thu a sawi bawk.
