Chief Minister, Pu Lal Thanhawla chuan nimin chawhnu khan Govt. Aizawl College-a Commerce zirna Block sak thar Salem Venga mi a hawng. Commerce Block building thar hi Sorkar laipui atanga Special Plan Assistance sum Rs 3,00,00,000/- senga sak a ni. Hemi rual hian Higher and Technical Education Minister, Pu R. Romawia pawhin he hmuna Cafetaria leh Students Common Room, RUSA sum Rs 70,00,000/- senga sak a hawng bawk. Hawnna inkhawma thusawiin Chief Minister chuan College chhungah Polictics la lut lo turin zirtirtute a ngen a, zirna ina Polictics-a luh apiangin buaina a chhuah thin bakah zirlai tam tak hmalam hun hman dan tur a buai phah thin niin a sawi a ni. Pu Lal Thanhawla chuan zirna in sang zawka zir thalaite chu zonunmawi chhawm nun kawngah te, Mizo tawng hman dik loh vanga chhe tan mek siam that kawngah te, hriselna ngaih pawimawh kawngah leh khawtlang nun siam that kawngah te tan la turin a fuih a ni. Chief Minister chuan zirlaite chu tum neia lehkha zir tur leh sorkar hna ringawt beisei lova mahni eizawnna hna thawh tur ngaihtuah turin a fuih a, NEDP hnuaia Entreprenuership Development Scheme an nei te hman tangkai tum turin a chah bawk a ni.
