Trump-a hi US president te zingah North Kore leilung rap hmasa ber a ni a, Trump-a hian Kim-a chu a duh hun huna White house tlawh turin a sawm tih a sawi. North Korea leh South Korea te inrina, demilitarised Zone tia sawi hmuna an inbiak \an hma hian ram hruaitu pahnihte hian remna leh muanna an duh tih lantir nan chibai an inbuk a, hei hi hun kal tawh te theihnghilh an remti tih lantirna a ni tih Kim-a chuan a sawi.
US leh North Korea te inbiakna a lo hlawh chham tawh hnuah tun \um inbiakna hian enge a rah chhuah dawn tih a la chiang lo a, hemi hmalam hian Singapore leh Vietnam ah te ram hruaitu pahnih hi an lo inbe tawh a, North Korea in nuclear ralthuam a tih changtlun titawp tura US in a nawrna chu an thupui ber anih laiin heng inbiakna an lo neih tawhah te hian thu mum an la nei thei lo a ni. Tun \uma ramri, demilitarized zone-a rei lote chhung an inkawmnaah hian Trump-a leh Kim-a te hian ram pahnih aiawhte an inrem theih lohna laite chingfel tura an inbiak zawm an remti a, Trump-a hian hmanhmawh taka thil tih a tum loh thu leh inbiaknain kawng dik a zawh chu a ngaihpawimawh zawk anih thu chanchinbumite hmaah a sawi.
Trump-a hian Japan a chhuahsan hmain, South Korea a tlawh tur thu leh hetah hian North Korea hotupa Kim-a’n North leh South Korea te inrina Demilitarised Zone-ah hian a be duh anih chuan inhmuh a remchan tur thu twitter ah a ziak a, Kim Jong-un hian ramri-ah hian lo dawngsawngin an inbe ta a ni.
