Tanhrila FCI kudam weighbridge aia Zuangtuia Supply kudam weighbridge-ah buhfai phur truck buk a zan zawk avangin Truck driver ten buhfai phurh luh an hreh a, Supply Minister hian weighbridge pahnih-ah hian truck ruak a buk chhin tir ve ve a, Zuangtui supply kudam-a weighbridge chu hman chhunzawm tawh loh tur thutlukna a siam nghal a ni.
Supply Minister chuan Mizoram Truck Drivers’ Association in Mizoram mipuite kan riltama kan awm phal lova theihtawp chhuah an tum thu thuchhuah an siam chu lawmawm a tih thu a sawi.
Tunah hian buhfai wagon 68 Bairabi ah a ding mek a, a phur tur truck indaih loh vangin tunah hian MLA te leh mi tlawmngai dangten an truck te an thawh a, a tul chuan sawrkarin ruahmanna dang a siam zel dawn tih Supply Minster hian a sawi.
Mizoram mamawh supply rawn phur luttu te hi endikna, screening paltlang thlap, him tawka ngaih an ni tih Supply minister hian a sawi a, tha taka lo tanpui a, lo tikhawtlai lo turin Veng leh khua hrang hranga task force te a chah a ni.
