Thuchah a sawiah Pu Rintea hian, Chief Minister in thurawn angin Covid 19 avanga mipuiten ei leh bara harsatna an tawh loh nan April thla ration buhfai quota chu tun thla tawpah sem a ni dawn tih a sawi a, AAY leh Priority Household card nei te a thlawna buhfai sem tur nih laiin APL zingah pawh harsa tak tak an awm tih sorkarin a hria a, heng mite chungchang pawh sorkarin a \ul ang zelin a ngaihtuah dawn tih a sawi.
Pu Rintea chuan, a thlawna buhfai an sem tur chu Labour, Employment, Skill Development and Entrepreneurship Department hnuaiah Labour Cess-a sum hmanga sem a ni dawn tih sawiin hetihrual hian harsa zual an awm em tih Local Task Force te chu an mahni huam chung \heuh lo thlithlai tura ngen an ni a ti. Pu Rintea chuan, mipui nitin mamawh essential commodities khaihlak lova Mizoramin a hmuh theih nan sorkarin theihtawpin hma a la tih a sawi a, mahni mamawh aia tam lei khawl chiama midang tana harsatna siam lo tur leh a man pangngai aia toa thil hralh lo turin mipuite leh sumdawngte a ngen a ni. Tun dinhmunah Mizoramin buhfai chhek khawl quintal nuai 1 sing 6 vel a neih thu a sawi a, FCI lamin Quintal nuai 1 sing 7 vel nei tura ngaih a ni a, tunah hian quintal nuai 1 leh sing 3 sang 2167 kudamah a awm mek a. Unload mek quintal sing 1 sang 7280 a awm a, rail a rawn phur mek quintal 17940 vel a awm tih FCI lamin an hrilh tih a sawi. Kawng laka thang mek, Tanhril leh bairabi kudam atanga phurhchhuah engemawzat a awm bawk tih Pu Rintea hian a sawi a, tun dinhmunah quintal nuai 3 chuang nei theiah an inngai tih a sawi.
Supply Minister hian state dang atanga buhfai leh nitin mamaawh phurtute tluang taka Mizoram a luh theih nan thuneituten hma an la tih a sawi a, buhfai phur truck te pawhin harsatna an tawh thu a hnenah an thlen tih a sawi a, Lock Down a nih avangin kawng lakah ei tur a awm mumal lova, an lirthei a chhiat thulhin workshop luhna tur pawh a awm lo ti sorkarin a hriatpui a, heng harsatna an tawhah te lo \anpui turin mipuite a ngen a ni. Pu Rintea hian, hri leng avanga harsatna hi eng chen nge a awh dawn tih hriat a nih loh avangin mitinte inremchem tura ngenin hemi chhung hian sorkar leh mipuite \an tlan a ngai a ni a ti a, mipuite chu thlaphang lo turin a chah a ni.
