Finance Minister Pu Lalsawta’n Pay Commission 7 na rawtna Pay Committee in an zirchianna report chu Cabinet ngaihtuah tura hmalak mek a nih thu a sawi. He thu hi vawiina Mizoram Information Service Association (MISA) Annual Conference I&PR Auditorium a neihah a sawi a. Pu Lalsawta chuan, Mizoram chu state naupang tak a nih avangin sorkar hnathawk hlawh leh hamthatna turah state dang te nena khaikhin vek theih a nih loh thu a sawi a, heti chung hian sorkar in a theih ang angin a hnuaia thawk te ham\hatna tur a ngaihtuah zel nia sawiin hlawh thar chungchang pawh cabinet ngaihtuah tura chhawpchhuah a nih theih nan hma lak mek a nih thu a sawi. Pu Lalsawta chuan, MISA member te chu sorkar hmalakna puanzar kawngah theihtawp chhuah tur leh thudik lo ziah avanga harsatna thleng thei lakah fimkhur turin a chah bawk.
MISA President Pu David L Thangliana pawhin thusawiin MIS-te chu sorkar hmalakna leh hnathawhte puangzar tu ber an nih thu leh MJA nen thawhhona tha tak an neih thu a sawi a, I&PR Deptt. in Lianchhiari Run Multi Facility Centre sa tur leh Ailawng khuaa Film City siam tura hma an lak dan a sawilang bawk. Inkhawm hi an pawl Vice President Pu C Lalnunkima’n a kaihruai a, chawhnu lamah ro an rel a ni.
