Dr R Lalthangliana hi MIMER a thawktute leh Health Department hotuten an lo dawngsawng a, MIMER hmunhma te an fanpui a, Laboratory te, zirlai ten an thil zir an tih chhinna hmun te, Library bakah an hmanrua leh bungraw neih dan leh an hmachhawp hrang hrang te a en a ni. Hemi hnua inkawmhona neihah Dr R Lalthangliana chuan, Medical College chu a ngaihpawimawh thu a sawi a, Session-ah pawh au chhuahpui tamtu a nih thu te, tunah a tak hmuh theiha a in din chho mek chu lawmawm a tih thu a sawi a, Sorkar hmasa in theihtawp chhuahin hma an la a, hetihrual hian hun tlemtea hnawhsa ruma thil tih a nih avangin enfel ngai lai erawh a awm nia a hriat thu a sawi a, sorkar hmasa thil tih hnualsuat erawh an tum lo tih a sawi.
Dr R Lalthangliana chuan, MIMER kalpui zel dan tur zirchiangtu tur Committee pawh din thuai a ni dawn tih a sawi a, Order pawh tihchhuah thuai a nih a beisei tih sawiin member-ah official te an tel dawn lo niin a sawi a, he Committee zirchianna hi Cabinet in a thlirho leh dawn tih sawiin MIMER atana tun aia sum tam zawk hmuh theih dan tur pawh dap zel a ni dawn tih a sawi.
Dr R Lalthangliana chuan, thawktute pawh tunlai thiamna ban pha thei tura inzir zel tura chahin hmanrua te pawh tunlai thiamna mil zel lei thiam a pawimawh a ni a ti. Hemi hnu hian Mizoram Nursing College a tlawh bawk.
