Congress party-a an Minister MLA te hi an ei ru tia sawi tur an awm si lova, NLUP an sem zel bawk sia, anni lo hi sawrkarna chang leh tur an awm lo. ZPM, MNF, BJP, PRISM te hi zawng an nawi riau mai. Kawngpui chhia lah an siam zel bawk si a, kei leh ka chhungte zawngin Congress bawk a ni kan vote dawn ni.
9485024048
—————
Lal chiah thlahlel, lal theihna tur a nih dawn phawt chuan engmah tih hreh lo nia hriatten Mizoram min hruai rei lutuk hi a pawi hle a ni. Mipuite hriat leh hmuh mai mai phak loh, ril takah an kawrap hle a ni tih an rahin a tarlang zel bawk, a va tenawm tak em! Mipuite harh a hun takzet a ni e.
Zopa
————–
Electric kal sual avanga in kang fo mai hi eng vanga kalsual thei nge? Nunna leh in leh bungrua a kang fo mai si a, a kal sual theih dan Electric lama mi thiamte khan han sawiho ula, a thei leh a neinung deuhte talin an lo inven nan a tha lo maw Pu ZONET?
Dindini pu
———–
Congress ho chuan Tripura-a Tuikuk hote chu Electoral Roll-a khung an tum thu Pu Hawla khan a sawi a, Chakma te pawh saw an vote bank a ni. YMA-ten ram leh hnam humhalh kumah a puang mek bawk a, mak ka tih em em mai chu zu zawrh duh lo anga lang, kohhran ho leh ram leh hnam humhalh kuma puang reng chung leh YMA member ni reng chung si a Congress ruh em em bawk site hi mak ka ti tawp thei lo. Kohhran leh YMA member nihna takah hian i chiang tlang ang u.
SANGA
———–
J. Thankima College zirlaiten an ram chhunga dan lova in sak thiah an tum a, Police ten an dang tih thu te kan hre zel a. Kan sorkar hian engatinge zirlaiten kut an thlak hmaa kut a thlak loh? Hmun thenkhatah khaw din phal lohna hmuna khaw dinah te mipui zawkin hmalak a ngaih fova, sorkar hi mipui hnunga kal mai mai tur a ni lo. Mipui buai hmaa che tur a ni. Mi leh sa force hman tula hman mai tur, Police lah a ngah. Sorkar muthlu, mipui ben harh ngai kan nei a va ang ve.
RK Sanga
———-
Assam leh Mizoram inrina ramri buaia a tu amahin kut lo la thlak rih lo tura ti si, Assam ram lam hian engvanga dan bawhchhia a, dik lo taka kutthlaka, in te lo sa nge an nih? Mizote engah maha min ngaih lohna leh min tham lohna a ni mai lo maw? Kan sorkar pawh hian palzam mai mai chi a ni lo tih hriain bawhzui vat rawh se. Zohnahthlakte ram, Mizoram hi inchi 1 pawhin kan tawlh dawn lova, a thiang bawk hek lo. Kan ram hi hrikpui tia lek pawh nise a thlavang hauha, a tul anga hma la zel turin kan inpeih reng e.
Hnam Arsi hruaitu, ZORAM SAKEI
—————-
Biakliana Petrol Pump-a petrol unload rimchhiat zia hi!! Zanah mut pawh kan mu thei thin lo. Hei aia rim chhuak lo zawng hian a tih theih em? Zan khat mai pawh a ni tawh lo, kum fe a kal ve tawh. Ninawm rapthlak tawh lutuk.
Ramhlun Venglai pa
———–
To, Pu Chhuanliana BVT, ka pu ka ngaisang em em che a, Zalena i huang pawh ka chhiar ngei ngei thin. I thil hriat reng/rei theihna leh i thluak that zia hi mak ka ti tâwp thei lo. Ka zawh duh tak che chu, kumin hian kan veng Dawrpui Presbyterian Kohhranin Centenary kan lawm mek a, mahse Kulikawn Kohhranin kum 2015 khan centenary hi an lo lawm daih tawh a, kan vêng aiin kum 3-in an lawm hma a nih chu. Ka lo hriat ve dan chuan Mission Veng leh Dawrpui Veng te hi Kohhran hmasa pahnih an niin ka lo hria a. Khawngaihin ka zawhna hi min chhan sak theih chuan ka lawm khawp ang. I chhanna nghakhlel taka lo nghaktu-
Dawrpui Pa
———-
Tunlai chu, “Pawm dan a tam, ngaihdan a tam” tihna karah kan ram thenawm Tripura, keini aia kum 20 chuanga advance tawh state hian ngaihdan tur a rawn tarlang chiang hlein ka hria. Tuna inthlanpui an neih turah hian term 4 lai lo CM tawh Manik Sarkar chu a sum neih zawng zawng Rs. 3,930/- chauh zuk nia mawle. Ama pualin lirthei leh in leh lo a nei miah lo lehnghal. An state erawh kawng engkimah hmasawnna a zuanin a zuanpui lawi si. Keini erawh kan CM leh MLA te chuan building leh thlam ropui, lirthei changkang nen an nei chek chuk a ni mai sia, term hnih khat chhung lekin an vua leh vangte nen lam mi hausa takah an chhuak zel mai a nih hi…! A ngaihna an hre ve ngang lo nge, development sum lah an thei sem ta mai a, an tlin reng theih nan mipuite chu sum sem tawk tarhin, min lilam kual ta mai mai a nih hi. Chutih laiin kut hnathawktute leh thalaite chu mahni ram ngeiah beidawng leh vakvaiin kan awm ta.
Hawh u, Zofate hi harh mai ni lovin i tho ang u. India ram state pachhe ber nih pawh hi a zahthlak zo zai ta e. Heng zawng zawng siam tha a, dinthar leh tur hian mahni line pawha mi chungchuang tak tak ten CM tha tur, kaihhruaina hnuaiah ZPM tangrual pawl an rawn din ta, i lo support bur mai ang u.”
Mizo Tlangval
—————
Kan vengah chuan sorkar lam atanga veng chhung kawngpui siamna atana hai chhuah cheng emawzat chu an han thawh dawn tak tak meuh chuan Congress hmalakna tur a niha, ram neitu MNF a nih bawk chuan phal a ni ngai lova, chutiang bawkin MNF hmalakna tur a niha, ram neitu Congress a nih chuan phalsak a ni lo leh a, chuvang chuan veng thanmawh bawk political lam zawnga inchhutsakna a lian hle niin a lang. Chuvang chuan veng chhung chuan hma kan sawn mawh hle dawnin a lang bawk. Hetiang hi an ni party lian inti leh ram hmangaih, mipui hmangaih inti te tih dan leh kalphung hluia la kal ngar ngar an nih avangin an tih awm tawk an ti a ni ber mai. Keini ZPM chu mipui duhsakna kan dawnga kan sorkar a nih chuan mi zawng zawng tana lawmna leh hamthatna turin veng chhung kawngpui kan kham ruah ruah mai dawn a ni. Mi zawng zawng sorkar siampui turin kan sawm a che u.
Ram tana in thawhpui, Neutral Group
——————-
Kan rama ka thil lo vei ve em em chu eng vangin nge sumdawng ho hian kan rama thil a van deuh hlek hian an thil zawrh an tih to vak zel? A chhan hriat a chakawm thin khawp mai.
ZDA, Republic
———-
