Hawh teh u, i ngaihtuah tlang teh ang u. Khawvela hripui leng meka kan awm dan hi. Tunah chuan tlemin thawk lak a hun ka va ti em. Khua leh khua kan inveng a, kan in-check vel te hi a \ul lem em ni? Entirnan, Vairengte, Zokhawthar leh ramri bul khaw dang tih loh chu. Chutiang ni lem lo ram laili leh khaw dangin an kaltlangna ni lem lo tena kan lo inkharkhip lutuk hian phurrit min siam belh mai mai a ni lo maw? Chumite khuaah chuan Covid 19 vei an awm tih pawh ni lo. Kan \hian, kan hmel hriat chiante kan lo indang vel te hian min tibuai a. Harsatna min siam a, kan inti buai tawn mai mai lo maw?
Din Dini pu
8974244232
Hripui leng vanga khaw tin a VLTF te Mizo tlawmngaihna vawng nung zel a hnam himna kengtu in ni tih hriain in hmalakna kan chhuangin kan fak che u a, a bik takin Bairabi leh Vairengte a ram leh hnam tan a theihtawp chhuah \hintu te, ram tan a thawk zek thei turin Pathian hnenah thinlung takin in tan kan lo \awng\ai \hin a ni tih Fakselna kaltlangin kan han hriattir che u a ni e.
Hnam Arsi hruaitu ZORAM SAKEI
9862014844
Lockdown pawhsei hma hian sorkar hnathawk leh pensioner te hlawh min pe vat se, a nih loh chuan kan buai lutuk dawn. In chhungkhur mamawh kan lam ve loh chuan lockdown vawi 2-naah chuan ril\amin kan thi mai ang. Lockdown kan hman dan hi a in ang lo a ni.
9862385339
Covid 19 hi Zofa te hian kan la hrechiang tawk lo hlein ka hria. Concern Department-te khan chiang leh zualin han puang zar teh u.
Hruaia Vanchiau
9436142700
RC GUNERS kha i nghei loh hmel. Hripui len lai, buai mup mup lai hian sorkarna chelhtu ni ta la eng i an ruai ka ring bik lo. Duh vang renga hri leng a ni lo a. Chu vangin sorkhar hi chu dem loh hram a va \ha em. Kan hun tawn hi a hmawr tawh a tin nih hi. Kan sualte sima inngaitlawma amah kan auh chuan kan PATHIAN hian min ngaidam zawk dawn a lo a ni.
TC VARTE
9612598771
Covid-19 vanga inkharkhip vangin pawl hrang hrangin CM Relief fund-ah Rs 3,72,00,000/- zet an chhung lut hi a hluin a ropui tak zet a ni. Heng sum hman \angkai hun chu tun inkharkhip chhung ngei hian khaw tin leh veng tina inkharkhip vanga chhuanchhamte tan LTF/YMA tinte kaihhruaina hnuaiah hman \angkai nghal ni se a va hlu dawn em! Inkharkhip a zawh hun chuan mahni theih tawk tawkin Pathian zara kan dam phawt chuan a theih ang angin kan thawk chhuak ve leh thei turah ngai ila. Tun inkharkhip hun lai ngei hi a mamawhte tana CM Relief fund hman \angkai hun ngei chu niin a lang. Tin, tun \um ration a thlawna dawngtu AAY leh BPL chhungkua, ration card eng leh pawl nei chunga smart phone hum leh 2 wheeler/4 wheeler nei thei si te u, sum tlemte a kan Lal Isua hralhtu Juda Iskariota nen tehkhin che u ila in lawm dawn em ni? Dik chiah loa a thlawna in dawn in ration khulna man zat kha han chhut teh u, cheng sang chuang a tlin pawhin a pel tam lovang. Chuti zat leka hlu chu kan Lal Isua hi a ni em le? Kan Lal Isua hi khawvel sum leh rohlu zawng zawng pawhin a phu loh a nih rualin tlemte chunga i rinawm leh i thinlung i pek hi a lungawi tawk a sin. Tlemte chunga rinawm thei lo tan tam tak chunga rinawm a theih loh. Tlemte chunga rinawm bul i \an ang u le.
Ramveitu
9089667399
Ram pum huap buaina chu kan tawng chho mek chu a ni a, ngaihtuahna fim tak kan neih a va \ul em. Mi tlawmngaiten venhim hna an thawk char charte hi a va ropui em. Chutih rualin ka ngaihtuahnaah chuan lockdown hi a \ul rual rualin, he ti teh bur lo deuh hian kal dan a awm lo maw, ei leh bar kan intodelh si lo, kan buaina a thuahhnih dawn a nih hi. Mi te anga eiruksa khawl \^n ve lo, hlawh chauh ring tan chuan tu’n nge hlawh siamin hlawh sem ta ang le? Pawisa a awm miau loh chuan tih dan tur a vang hle a ni. Thingtlang lam pawh thlai chi thlak hun lai a ni a, thlak thei lova an awm chuan an lovin a tuar ngei dawn a, eitur nei lova an awm vaih chuan Zoram hi kan buai nasa hle dawn a ni. Zoram dung leh vangah khaw tinin ram pawn a\anga lo luhna tur vengin theihtawp chhuah lehzual ila, a chhunga chengsa te hi virus kan kai sup sup sia tih pawh ni lo. Lockdown a\anga chhut chuan a kai pawh lan chhuah hun tawh a ni a, kai belh kan awm kan hre lo va, tuna taka kai thar thut thu lah awm hek suh. Chuti chunga ui thlun beh taka inkhuah khirh beh tlat mai hi eng nge a sawtna ber ni ta ang? A pawimawh ber chu ram pawn a\anga lo lut tur venhim a ni zawk dawn lo’m ni? Chumi ni lova kan inkhung beh ringawt hian min chhanhim a hnehin buaina nasa zawk kan tawng ngei ang.
87945 19384
Kan sorkar hrawn mek te chuan thla an van ti muang em. Duh khawp lohna lai zawng an awm tho vang, an theih tawp tak meuh an chhuah tih erawh a chiang e.
96123 55917
Covid-19 hri leng mekah hian a bik takin ramri a duty Village Level Task Force leh Police-te an thawkrim tak zet. Assam leh Tripura ramri a khua te phei chu an thawkrim lehzual a, heng volunteer-te hi mi \hahnemngate thawhkhawm hmangin an la intungnung ve hram hram bawk e. Task Force duty-te èi leh bàr tur leh an mamawh ang ang phuhruk nan hian Chief Minister Relief Fund hi \hahnem deuh zawk sihchhuah ni teh se. Mi \hahnemngai ten an tlin reng dawn silo.
Lba Pa
84140 29478
Mipuite hripui vangin kan inkhawm thei lo a, Zonet kal tlangin Frederick-a rawngbawlna kan en a, kan hlawkpui hlawm hle mai. Tunah Sailoa’n rawngbawlna a rawn nei veleh a, a sawi thiamin tunlai \halaite hriatthiam turin a sawi \hin a mahse, a thusawia ka ngaimawh em em mai chu thiam ber ang a, sap\awng a’n hmang thlazen hi a \ul ber em aw ka ti deuh. Mizo \awnga sawi fiah theih loh a awm a nih chuan thuhran ni se.
FacaNsons
81318 61999
Pu Zonet, Fakselna kaltlang hian hla thlan min phalsak em le? Zonet programme “Venpui Zan” a Maruati zai kha thlarau mit a\anga thlir pawhin ava ropui em ve aw. Zonet Rimawi channel a\ang hian en chhunzawm theih nise ka va ti ve. Hla hmàng hian Pathian ropuizia hi a puanchhuah theih a ni tih hi Maruati hian a tilang chiang tak zetin ka hria. Thinlung leh tihtak zet a a zai hmel kha hmuh a nuamin, a ti mai mai lo a ni tih kha a hriat a, fak hla hmang hian kan Pathian ropui zia hi a puanchhuah theih a ni tih mit leh beng ngeiin min hriattir niin ka hria. Kan tunlai boruak nen ka thlirin Zonet thawktute infakawm thlawt bawk e. Maruat, Pathian fakin zai zel teh. I fak Lalpa hian a hruai zel ang che.
Sangsangi Pa, Armed Veng South
97747 73425
Tunlai thil thleng kan ngaihthlakna ber Zonet chu keini Lawngtlai chuan ni tam kan hmu ta lo. Kan local cable operator ten ‘Theiriatah Zonet a chhiat avangin a en theih loh a ni e’ tih an ziak hi ni engemaw zat chhung a kan Zonet hmuh chhun a ni ta. Hetia a chhiatna hre reng chung hian engtia rei nge kan nghah dawn le? Pu Zonet Theiriat (Lunglei) ah hian thawktu in nei mial lo’m ni? Kan va hawihai rei ta em!
Zonet ngainatu, Lawngtlai
6033 020 793
MNF ho hian in thlan dawn khan nuai thum aia tlem lo kan sem ang kha an ti a, tun hi sem hun chu a ni mai lo’m ni. Inhlawhfa chawp kan tam si a, sum lak luhna hre lo kan tam si, an sem dawn a nih chuan sem hun tak a ni.
6033 123 711
Pu Zonet, Mamawia gas agent hian Tualpui khua in za nufa ve lem tana gas bur 40 chauh mai min pe \hin hi chu kan khawpkham lo hle \hin mai a, hei hi tihdanglam theih a ni a ngem le? A in report hmasa apiangin an chang mai bawk si a, thla li/thla nga kan chang lo mai zel si a, a manganthlak lutuk. Zonet Fakselna kal tlang hian ka rawn zawt tawp mai a ni. Thuneitu lam te khan min han chhang teh u. Mumal zawk a kan kal theih nan min han hrilh hram teh u.
98565 36040
Kan tunlai boruak hi chuan mi tin nunah hmun a luah zo ngang a ni ange, Sapuiin a sa seh tur thawm nei lo a a veh ang hian muang leia kan awm lai hian min vehtu chuan min man chat ang tih pawh a hlauhawm hlel lo ve ka ti. Khawl lah chu kan nei chaurau bawk si a, rinhlelh chauh ni loin mipui zawng zawngah hian test nei ta ila chu Covid-19 hrik pai hi kan tam viau lovang maw? Ngaihngam taka awmna hun chu a la ni loin ka hria. Ram dangin an buaipui tawh loh hnuin kan ramah hian kan buaipui hnuhnawh ang tih pawh a hlauhawm ka ti. Mipui zawng zawngah hian test neih theih dan awm se chuan chuta kan result a zirin inkhuahkhirhna pawh khauh leh zual a kalpui te pawh a \ha viau lovang maw? Rinhlelh chauh kan test chuan kan rinhlelh loh te zingah hri kai lo awm ta se an in hriatchhuah hmain engzatin nge lo kai hman ang? Ngaihtuah chian ngai inti ve lo maw?
Chhaktiang Keite
76279 14601
India ram state hrang hranga Mizo zirlai tangkhang zawng zawngte lockdown avanga Air ticket la tawh lo haw hman tawh lo mi tam tak an awm a, chung mite ticket chu refund ngei turin Mizoram sorkar hian hmâ lak sak ngei se, an rawn hawna tur pawh ngaihtuahsak thei se a lawmawm ngawt ang.
96122 45884
Covid 19 hripui avanga kan inkharkhip chu thlarau lam harhna a thleng nasa niin alang a, a lawmawm hle mai. Pathianin Mizo hnam tlemte hi min va hmangaih ve aw a tih theih awm e. Thlamuanna Crusade-ah Pathian thuchah kan han ngaithla thei hi, a hrana inkhawm peih ve miah ngai lo tan bik phei chuan malsawmna a ni ringawt mai. Khawpkhamlo fe fe lah kan \hahnem viau reng a. Ka ngaihtuah mai mai a, Lockdown hi kalpui leh a nih hmel si a, heti a nih chuan Pu Zonet, kan Synod Speaker chhuanawm tak tak te mi 70 lai mai Pathianin a hman em em hote hi hmundangah an fehchhuak thei chuang si lo a, Crusade chhunzawm a nih phei chuan anni ho hi hman \angkai an nih theih chuan mipuite tan a va \ha dawn tehlul em! Midang pawh an \hat vek rualin a bikin mahni ngaihdan han rawlh ve zawk ila, Holy Fire Team Speaker, Upa PC Lalhmachhuana te phei hi chu remchang nisela chu a duhthusam leh zual ang maw le. Zai lam rawngbawlna hi chu channel bik a awm a, sermon lam hi awm ve tho mahsela duh bik ngaihthlak hi a harsa \hin si a, chuvangin he lockdown hi Pathian thu boruak kal lai lo ni bawk nen, min han hlui thei leh ula chu Pathian thutaka tuihal mek te tan chuan ava hlu leh zual dawn em. Programme siamtute hian khawngaihin han siam rem hram teh u khai.
Serlui Pachuau
87874 87887
Fakselna hi manhla ka ti \hin khawp mai, a \hen a hlawk thlak ka ti a, a \hen erawh nuih te a tiza ve viau thung a. Chutih rualin, News lamah te political party hruaitute thuchhuah kan lo hmu ve zel a, an thuchhuah erawh Covid 19 lam hawi a kan ram inrelbawlna a an ngaihdan a ni ber awm e. Kum reilo te liam ta lawkah khan General Election kan nei zo chauh a ni a, khata \ang a an level kan en chuan thuchhuah nei lo zawk se tih vawng vawngna tham thuchhuah erawh kan hmu niin ka hria. Chuvangin Covid 19 vang a kan buaina leh tun a kan sorkar hmalak dan hrang hrang hi a la fuh hrih zawk a ni lo maw? System thar duan tur hre miah si lo hian sawi lo zawk mai se te ka lo ti ve deuh mai mai a. Thuchhuah hming pu hluai ta si chu kan lo ngaithla uluk lo thei si lova, a rawn sawi erawh a ropui lo em a ni. Ideologist mai niin a lang. Chuvangin mipui ten kan lo enna level leh a thuchhuah hi a in balance lo ti ila a dik ber awm e. A SUPER LO TLAT
CHHIMPHEI PA
87875 73941
Hripui vanga kan inkharkhip laia thlamuanna leh beiseina nung kan neih theihna tura TV kaltlanga rawngbawltute chungah kan va lawm êm! Heti ang ruahmanna siamtu ZONET chungah pawh lawmthu kan sawi e. Mahse e, Pu Zonet, Pathian thu nung, tun damlai la la leh thih hnu piah lama nun neih theihna tur \hahnemngai taka (Live-a) sawi a nih lai a, thu bawkvak huanga chaw dangral leh tisa thil fakna lo kal zut zut hi chu a va inhmeh lo êm! Heng tisa thil fakna hian thu tak lak ata ngaihtuahna a hruai peng zel a nih hi! He hun rei lote chhung hi chuan inzuar lo ngam ta ula, Zonet hian kal harsatna tur khawpin sum a hlohin, a ke a bai phah dawn em ni aw?
H. Zuala, Bazar Veng, Thenzawl
96122 53969
March 22 a\anga April ni 14 thleng hri leng laka kan him theih nan sorkar thuneituten inkharkhip neih tur thu an chhuaha, mipui pawhin thu kan awihin hmalatu hrang hrangte pawh an hahin an fakawm khawp mai. Chutih rual a thil lo lang chiang ta chu Mizoram hi a intodelh loin vaiho thawhchhuah ringa khawsa kan ni tih hi a ni. Thla khat em pawh la ni loah kan mangang a, kan buai em em mai a, tunah pawh kan himna ngaihtuah ai chuan kan ei leh in nei lo leh duh vang hian kan phun nasa \an hle a ni. He kan hun tawn hi Mizo mipui ten harh chhuah phah nan hmang ila, intodelh turin \an ila ang u. Thingtlang lo nei, huan nei leh leilet neite pawhin kum khat Lockdown pawh nise kan ram kan chawm thei ang tih rilru han pu teh u. |ul lova sum hmana, mamawh lem lo lei leh lakkhawmte hi a \angkai lo tih zir chhuak ila, inrenchem a \ul a, kan mamawh a ni tihte pawh hi zir chhuak ang u. Khawtlang inrelbawlna leh kohhran programme hrang hrangah pawh hian zir chhuah tur kan nei nual awm e. He kan hun tawn hi a \ha zawngin harh thar nan Mizoram mipuite hian i hmang \heuh ang u.
LT Ralte
